112 SOLUCIÓN

Aberto prazo para solicitar as axudas por fillos e fillas menores de 3 anos

2012-02-16T13:12:00.000+01:00

A Secretaría de Muller da CIG informa da publicación no DOG da orde pola que se establecen as bases para a concesión da prestación económica de pagamento único por fillos e fillas menores de tres anos para este 2012. A Xunta volve excluír destas axudas ás persoas que o pasado ano presentaron a declaración da renda, aínda sen ter a obriga de facelo.

Poderán beneficiarse desta prestación aquelas persoas con fillos/as nacidos entre o 2 de xaneiro de 2009 e o 1 de xaneiro de 2012 e que, por razón dos ingresos obtidos durante o ano 2010, nin elas nin ningún membro da unidade familiar estivesen obrigadas a presentar a declaración da renda correspondente a ese período, nin a tivesen presentado de xeito voluntario aínda sen estar obrigados a iso.

A prestación consistirá nun pagamento único de 360 euros por cada crianza menor de tres anos e o prazo para entregar as solicitudes estará aberto até o vindeiro luns 26 de marzo.

Para consultar a orde publicada no DOG e descargar o formulario de solicitude, clic aquí.

Unha reforma que nos agrede!

2012-02-11T13:11:00.000+01:00

Xa está aquí unha reforma laboral que deciden un Madrid uns señores que non teñen que someterse cada día a traballos precarios e que teñen salarios vitalicios, pluses por comisións, sistemas privados de saúde e máis, moito máis.

Entre outras medidas, redúcese de 45 a 33 días por ano traballado a indemnización polo despedimento improcedente, afectando en parte, e por primeira vez, mesmo aos contratos subscritos con anterioridade á reforma. No caso de despedimentos por causas obxectivas (EREs) elimínase o control previo por parte da administración das causas alegadas polas empresas. Ábrese ademais a posibilidade de recorrer a ERES no ámbito do sector público. Baixo o eufemismo de “Impulso do contrato para a formación e aprendizaxe”, amplíase a idade máxima para ter acceso a este tipo de contrato até os 30 anos, cando menos até que a taxa de desemprego baixe do 15%. Permítese ademais que logo de ter este tipo de contrato nun sector de actividade, o traballador volva ter esta modalidade de contrato noutros sectores. Podes ser un eterno aprendiz até os 30 anos, pasando por diferentes sectores. Unha vez máis insístese en bonificar ás empresas con fondos públicos, coa desculpa de facilitar o emprego de carácter estábel fomentando mesma competitividade entre os propios traballadores, segundo teñan ou non prestación por desemprego. Legalízase a fraude que xa existe na actualidade de que haxa traballadores contratados a tempo parcial pero con xornadas superiores e a libre disposición da empresa. Na negociación colectiva dáselle prioridade absoluta aos convenios de empresa o que suporá dividir moito máis aos traballadores/as, rebaixar salarios e condicións laborais xeneralizando así o dumping social. Alén diso, facilítase que as empresas deixen de aplicar os salarios pactados en convenio colectivo (descolgue). Créase un novo tipo de contrato indefinido para empresas de até 50 traballadores/as, que terán un período de proba dun ano. Isto implica que o traballador pode ser despedido libre e gratuitamente, sen ningunha indemnización, durante todo este tempo. Isto vai fomentar a maiores, maior rotación no posto de traballo e o incremento da temporalidade. Hai unha desregulación absoluta das condicións de traballo dentro da empresa, tanto no relativo ás funcións que pode desempeñar o traballador, como na xornada, o horario ou o sistema de rendemento, dándolle prioridade absoluta ás necesidades da empresa sobre os dereitos dos traballadores. En fin: unha marabilla!

Ante este durísimo paquete de medidas, dos que estas son apenas un exemplo, Seixo asegura que, tal e como se demostrou coas reformas laborais anteriores, esta tampouco vai favorecer a creación de emprego. “O problema está no modelo económico e nas políticas que se fan”. Fronte a isto, aposta por atacar a crise a través doutras políticas fiscais que xeren ingresos ao estado, incrementar o investimento público para reactivar a economía e crear unha banca pública que garanta crédito e liquidez á pequena e mediana empresa. “O propio Banco de España, cando fala de que entramos de novo en recesión di que as causas fundamentais están na falta de crédito e na caída da demanda interna”, lembra o secretario xeral da CIG quen insite en que “a caída da demanda ten que ver é coa caída dos salarios. E esta reforma o que vai provocar é unha caída aínda maior dos salarios e precarizar de forma xeralizada as condicións da clase traballadora”.

Para Suso Seixo, ante estas medidas só cabe respostar coa mobilización social. “A sociedade ten que asumir que con este tipo de políticas non só non saímos da crise senón que se agudiza aínda máis a recesión económica. Estas políticas fanse desde unha vertente ideolóxica determinada, a da dereita e do neoliberalismo”.

Por iso, fai un chamamento a que todas as organizacións sindicais se sumen á convocatoria de folga xeral e defendan outro tipo de políticas. “Entendemos que está máis que nunca xustificada e que as políticas antisociais e antiobreiras do PP non quedan aquí. Nos orzamentos que se van aprobar no mes de marzo estamos convencidos de que van vir medidas aínda moito máis duras”.

+ info: BOE da Reforma Laboral

A CEG tira o disfrace

2012-02-09T12:14:00.000+01:00

Antonio Fontenla e Núñez Feijóo

Xa hai tempo que avanzábamos que esta crise estaba a servir de coartada para transferir nichos de mercado do sector público para o privado, favorecendo así a concentración de capital nas mans duns poucos, e socializando as perdas. Houbo quen dixo que éramos uns apocalípticos, pero, tristemente, o tempo parece darnos a razón cada día que pasa.

A patronal galega (CEG) acaba de enviar ao presidente de Xunta un documento coas súas receitas para reactivar a economía. Nese documento, propoñen, sen rodeos, privatizar os servizos públicos que mais custan á Xunta, eliminar os "prescindíbeis", rebaixar os impostos ás empresas, que as empresas privadas participen na xestión dos servizos, como, por exemplo, dos hospitais, e introducir o copagamento naqueles sectores do público máis conxestionados, isto é, fundamentalmente na sanidade, pero non só. En total, segundo informan algúns medios, un total de 140 medidas nesta liña que foron entregadas nun acto privado entre Antonio Fontenla, o presidente da CEG, e Núñez Feijóo, e do que nada se soubo até que esta semana a propia CEG fixo público o encontro.

CIG convoca Folga Xeral

2012-02-08T10:40:00.002+01:00

No día de onte, 7 de febreiro, a Conferencia Sindical Nacional da CIG aprovou por aclamación a convocatoria de unha folga xeral para os últimos días de marzo. Deste modo, a CIG é o primeiro sindicato que convoca unha resposta do conxunto da clase traballadora para protestar, por unha banda, contra o acordo alcanzado por CC.OO. e UGT coas patronais CEOE e CEPyME, e, por outra, para oporse á reforma laboral que nos próximos días aprovará o governo de Rajoy en Madrid e que afondará na liña regresiva de dereitos sociais e salariais que as últimas reformas xa tiñan iniciado. Tal como asinala o secretario nacional, Suso Seixo, “Tampouco debemos de esquecer que teñen previstoaprobar no mes de marzo os orzamentos xerais para 2012, quecontemplará importantes recortes do gasto público xa que pretendenreducir o déficit en 40.000 millóns de euros”.

Os acordos pactados por UGT e CCOO e a reforma de Rajoy, e tamén os recortes en servizos e prestacións sociais que irán incluídos nos orzamentos do Estado non teñen nada que ver coa crise, senón co aproveitamento que os mercados e as grandes empresas están a sacar dela, e por iso non poden deixarnos indiferentes nen á marxe. Porque aínda nos queda dignidade, protestamos!

Manipulación dos Medios

2012-02-02T18:19:00.000+01:00

Formación: A manipulación dos medios de comunicación. Prof. López Aranguren

Sae o Liña Sindical

2012-02-01T00:02:00.000+01:00

A partir de hoxe, a Sección Sindical da CIG no 112 ten un novo voceiro, mensual e impreso, que se compatibilizará con este caderno dixital: o Liña Sindical. No primeiro número, a apresentación do proxecto, unha análise dos atrasos nas pagas extras, unha explicación de en que consiste unha Sección Sindical e por que é necesaria no 112, un avanzo sobre a nova reforma laboral pactada pola patronal e os sindicatos CC.OO. e UGT contra os traballadores e unha sección fundamental para todo o persoal do 112: novidades do sector das emerxencias. Porque o noso non é telemarketing. 112 Solución!

Descargar a versión PDF

A CIG denuncia que CCOO e UGT ceden ás demandas da patronal traizoando á clase traballadora

2012-01-26T15:33:00.000+01:00

Antolín Alcántara, secretario confederal de negociación colectiva asegura que “estamos ante o maior ataque da historia aos salarios da clase traballadora”

A CIG manifesta a súa máis enérxica e rotunda oposición á cesión deCCOO e UGT ante as demandas da patronal, asinando un acordo polo que osincrementos salariais deixarán de calcularse en función do IPC como se viñafacendo até o de agora. O secretario confederal de Negociación Colectiva,Antolín Alcántara considera que estamos “ante o maior ataque na historia aossalarios da clase traballadora”.

Segundo as previsións de organismos internacionais, a inflaciónacumulada nos próximos dous anos no estado español será do 4%. Fronte a esteincremento do IPC e, segundo o pactado por CCOO e UGT, os salarios só medrarán,neste ano un 0,5% e para o próximo un 0,6%. Se a isto se lle engade oincremento salarial pactado por estas centrais sindicais para 2011, de tan só o1% e que a inflación foi superior, a perda salarial destes anos acadará o 4,1%.

O salario medio en Galiza é de 18.000 euros. Segundo os cálculos daCIG, ao medrar a masa salarial por debaixo do IPC, as traballadoras etraballadores perderán, en catro anos, nin máis nin menos que 3.000 euros.

Alcántara considera que se trata dunha cantidade “espeluznante” que,“en virtude de non se sabe que autoridade e en representación de quen, CCOO eUGT acordan sustraerlle á clase traballadora en favor da patronal”.

O secretario confederal de Negociación Colectiva afirma que esteacordo terá gravísimas consecuencias nas condicións de vida das traballadoras etraballadores, provocando un empobrecemento da clase traballadora.

Flexibilidade

CCOO e UGT non se limitan a reducir os salarios. Tamén lle outorgan aoempresariado a potestade para axeitar a xornada ás súas necesidadesintroducindo unha flexibilidade do 10% e discrecional do 5%.

Alcántara advirte que, en total, son aproximadamente 20 días deflexibilidade ao ano nos que o empresario poderá aplicar unha xornada conformelle conveña e os traballadores non verán suxeita a súa xornada a ningúncriterio estabelecido. “Non terán unha xornada estábel, non se saberá candoteñen que traballar e cando teñen que descansar. Isto afectará especialmenteaos traballadores temporais, cun contrato de varios meses, que van traballarmáis días dos que lle corresponden nun período e non poderán recuperar todoseses días traballadores por decisión patronal”.

Descolgue

Alén de asinar unhas condicións salariais e laborais “miserentas”,CCOO e UGT pactan a posibilidade de descolgue na aplicación do convenio entodos eses dereitos, sempre que se considere que a súa aplicación pode afectará súa competitividade. “Deixan aos traballadores e traballadoras vendidoscompletamente á patronal”.

Diante desta situación, Alcántara asegura que CCOO e UGT estánatendendo máis aos seus intereses, “para manter os privilexios derivados dodiálogo social, nunha actuación sen precedentes que implica sacrificar á clasetraballadora”.

Por exemplo:

2012-01-12T18:19:00.000+01:00

Novo exemplo de especulación coas emerxencias

2011-12-15T10:47:00.000+01:00

Velaquí mais un exemplo do modo como a especulación se ten introducido nos servizos de atención de emerxencias grazas a empresas que proveñen do ámbito do telemarketing. O Sistema de Emergencias Médicas (SEM) de Andalucía está xestionado pola empresa Arvato Qualytel, que desde a súa chegada reduciu o persoal do servizo en 40%, pasando de 280 a 167 empregados e facendo con que o número de chamadas por operador e día, que antes eran de 80-100, se duplicase. A compañía tratou de xustificarse aducindo que moitos dos traballadores non posuían o perfil profesional que se exixía, malia o cal moitos deles levaban máis de 5 anos prestando servizos no SEM. Despois dos protestos reiterados dos traballadores, o mércores pasado os directivos do SEM aseguraron que o servizo 061 funcionaba con absoluta normalidade, pero ao día seguinte, xoves, presentáronse no centro para coñecer que tiña acontecido cos centos de chamadas que non foran atendidas, motivo polo que Qualytel tivo que incorporar de urxencia a 25 operadores despedidos e contactar con algúns que estaban de vacacións con tal de cubrir un servizo que, pola súa pésima xestión, tiña quedado claramente desatendido e inoperativo. O problema, en calquera caso, continúa despois desta recuada da empresa, e malia que os directivos do SEM aseguren que non hai de que alarmarse. En fin: claramente, hai que se ir preparando.

+ info: Semes Andalucía

A CIG pide o voto para as forzas políticas galegas, nacionalistas e de esquerdas

2011-11-18T14:20:00.001+01:00

Alerta de que unha maioría absoluta do PP "vai empeorar aínda máis" a situación, porque afondará nas políticas de recorte de dereitos e gasto social aplicadas polo PSOE.

A Confederación Intersindical Galega considera que nunha situacióneconómica e social como a actual, os resultados das eleccións do 20-N cobranespecial importancia, como tamén “a quen lle deamos o noso voto”. Por iso, a centralsindical fai un chamamento aos traballadores e traballadoras a participaractivamente nestes comicios “apoiando e votando a aquelas forzas políticas que,na rúa ou nas institucións, estiveron connosco loitando contra as medidaspolíticas tan antisociais e antiobreiras e defendendo un novo modelo económicoe social máis xusto, solidario e democrático”.

A CIG alerta de que o PSOE no Estado e o PP en Galiza convertéronsenos grandes defensores deste sistema capitalista neoliberal e aplicaronfielmente as políticas que, en materia laboral, social, económica ou fiscallles marcaron o Banco central europeo, o Fondo Monetario Internacional ou aComisión Europea, institucións todas elas ao servizo dos intereses daoligarquía española e europea.

Xunto a isto, advirte da posibilidade de que o PP poida gañar aseleccións do 20-N por maioría absoluta, o que non só non vai mudar estasituación senón que a vai empeorar aínda moito máis para a clase traballadora,“pois van incidir e afondar nas políticas de recorte de dereitos e do gastosocial levadas adiante polo PSOE no Estado”.

Programa do PP

Para a CIG, as medidas que se apuntan no programa do PP, “aínda quepretendan disimulalo”, van dirixidas a dar máis facilidades ás empresas paradespedir, máis contratación temporal, redución de salarios, xornada laboralmáis flexíbel, recorte do dereito de folga, prioridade dos convenios de empresasobre calquera outro ámbito, recorte dos impostos ás grandes empresas e aocapital, recorte do gasto público e privatización do ensino e a sanidade,redución das prestacións por desemprego... “Isto é o que nos agarda aostraballadores e traballadoras se gaña as eleccións o PP, a mesma política que oPSOE, pero máis cargada de bombo”, alerta.

Lembra que en Galiza temos experiencia de sobras de cal é a políticado PP e os intereses de clase que defende: recorte das prestacións sanitarias efarmacéuticas ás persoas sen recursos, colaboración coa patronal nos EREs,supresión de servizos sociais, recorte do gasto no ensino e na sanidadepública, abandono dos nosos sectores produtivos, entrega da caixa de aforros ábanca privada, persecución do idioma galego, autoritarismo, antigaleguismo esubmisión ao poder central e á oligarquía española.

Ante isto afirma “o noso voto é moi importante” subliñando que “a maioríados/as deputados/as e os/as senadores/as do Parlamento español, co seu voto,aprobaron as leis responsábeis do recorte de dereitos laborais e sociaisconquistados pola clase traballadora tras moitos anos de loita”.

Por iso, reitera a necesidade de participar activamente, porque “adereita si que o vai facer” e chama a votar forzas políticas galegas,nacionalistas e de esquerdas”.

Humor (en apoio do persoal da CRTVG)

2011-11-10T17:01:00.001+01:00

Denunciar a quen denuncia

2011-11-10T01:56:00.001+01:00

Iso é o que pasa cando un cidadán denuncia publicamente que, como resultado dos recortes en servizos de emerxencias, unha ambulancia aumenta o seu tempo de resposta e, consecuentemente, presta un peor servizo. Xabier Aboi, responsábel nacional de Mar na CIG-FGAMT acaba de ser denunciado pola Consellaría de Sanidade por ter "revelado secretos" ao ter anunciado publicamente os tempos de resposta da ambulancia que presta servizo na área de Marín, datos que, por certo, son públicos e consultábeis a través do Parlamento Galego despois de que a Consellaría se vise obrigada a presentalos por requerimento do BNG.

O compañeiro Xabier Aboi negouse a declarar ao considerar esta acusación como ridícula e carente de sentido, polo que agora compete á Fiscalía decidir se continúa coa "investigación" ou arquiva o caso. Desde o 112, vaia o noso apoio para Xabier Aboi e o persoal de ambulancias que presta servizos precarizdos pola Consellaría que dirixe Pilar Farjas.

+ info

A crise, o sistema e a soberanía

2011-10-22T16:33:00.000+02:00

Juárez debe demitir

2011-10-19T19:21:00.000+02:00

Despois de que leven xa ardidas mais de 25.000 hectáreas de zona forestal en Galiza, a CIG ven de solicitar, hoxe mesmo, a demisión do Conselleiro de Medio Rural, Samuel Juárez, que ten manifestado reiteradamente a sua incompetencia á hora de xestionar un outubro negro para o noso patrimonio ambiental e forestal.

Desde o 112 vimos manifestando desde hai tempo o noso total apoio aos compañeiros e compañeiras do Spdcif e de Seaga, cos que estamos permanentemente en contacto debido ao noso traballo. É precisamente ese contacto o que nos permite corroborar o diagnóstico que fan e, en última instancia, apoiar tamén a súa exixencia. Samuel Juárez debe demitir.

Onde está Feijóo?

2011-10-17T20:12:00.000+02:00

ASÍ APAGABA FEIJÓO OS INCENDIOS EN 2006
(Unha imaxe vale mais que mil palabras)

Medio Rural aparca a sua flota contra incendios

2011-10-09T23:18:00.002+02:00

As neglixencias da Xunta de Galiza no que respeita á xestión das situacións de emerxencia son tais que mesmo superan a tradicional ausencia de asuntos galegos nos xornais madrileños. Tanto é así que El País publicaba hoxe mesmo unha nova que debería facer dimitir a mais dun cargo político. Tampouco é nada que o persoal de emerxencias non soubéramos: que chegado setembro, dá igual o estado en que se encontre a loita contra incendios forestais, a Xunta despide persoal das brigadas de Seaga e as autobombas, carrocetas e outros vehículos quedan estacionados nun parque móbil improvisado á espera do ano próximo. Tanto dá se non hai incidencias ou se, como acontece con este outubro inusual, os montes arden como en pleno mes de agosto.

Como sinala El País, Medio Rural continua sen ofrecer o dato dos recortes que está a aplicar ao persoal activo das brigadas, que os propios brigadistas cifran por volta do 40%, sen contar o persoal que é obrigado a ir de vacacións para que a Xunta non teña que pagalas despois, cando de verdade non haxa incendios. O PP, de todos modos, di que hai moito máis persoal do que debera (que outra cousa vai dicir?), pero o persoal do 112 sabemos perfeitamente como, nas dúas últimas semanas, o persoal do SPDCIF se está vendo obrigado a pedir constantemente a activación de Grumir, carrocetas de concellos e mesmo bombeiros urbanos perante a falta de persoal propio.

Desde o 112, o noso maior apoio aos compañeiros de Seaga e do Spdcif; e a nosa condena mais rotunda contra os irresponsábeis e neglixentes políticos que se escudan na crise para ir ás caladas convertindo o traballo dos servizos públicos en fonte de lucro para o sector privado.

Éxito da folga de ambulancias contra os recortes da Xunta

2011-09-09T10:36:00.000+02:00

A CIG cualificou de éxito a xornada de folga das ambulancias celebrada onte, 8 de setembro, contra os recortes no servizo de transporte sanitario urxente decretados pola Consellaría de Educación e a Fundación 061. A Xunta, coa intención de eliminar esta folga pola vía rápida, exixiu uns servizos mínimos de 100% no transporte urxente de 061 e de 50% nos traslados inter e intrahospitalarios. Porén, a resposta do persoal das ambulancias non destinado a servizos mínimos foi, na práctica, do 100%.

O secretario do sector de Transportes da FGAMT-CIG, Xesús Pastoriza, subliñou na rolda de prensa ofrecida polas centrais sindicais en Ferrol que as protestas contra os recortes nos servizos de ambulancias comezaron hai un ano, cando os sindicatos se mobilizaron en rexeitamento da modificación do Real Decreto que regula o transporte sanitario. “Daquela xa advertíamos do recorte que se ía aplicar na prestación de servizos, para o que os cambios no RD puxeron a base legal”, apuntou.

Hai unhas semanas a Consellaría de Sanidade anunciaba os primeiros axustes na atención urxente prestada a través do 061, efectivos a partir do sábado 10 de setembro: desaparición dunha ambulancia en Foz, supresión do servizo nocturno en Ponteareas, Baiona e Marín e eliminación da actividade nocturna as fin de semana dun dos vehículos de Vigo. “Estes son os primeiros recortes, pero non serán os últimos”, advertía Pastoriza, quen aseverou que as organizacións sindicais teñen noticia de que haberá novos recortes no transporte urxente e unha redución de prestacións “brutal” nos servizos non urxentes.

Sobre este punto, o responsábel de Seguridade e Saúde da FGAMT-CIG, Ernesto López Rei, matizaba na rolda ofrecida ás portas do Hospital Materno-Infantil da Coruña, que nos atopamos ante “unha administración mentireira que ten como único obxectivo eliminar os servizos públicos básicos”. Rei lanzaba estas acusacións referíndose á situación paradoxal na que se ten posto a propia Consellaría ao decretar uns servizos mínimos para a folga que van ser superiores aos servizos completos achegados a partir do próximo sábado. “A partir do día 10, a administración deixará descubertos servizos que hoxe considera esenciais”, criticou.

Nesta mesma liña expresábase o secretario comarcal da FGAMT-CIG de Ferrol, Alexandre Romero, quen afirmou que “non se pode consentir que sexa a cidadanía a que pague as consecuencias da crise”. Romero indicou tamén que estes recortes non son senón unha desculpa do goberno galego para avanzar no camiño da privatización dos servizos públicos, polo que advertiu que “coa saúde non se xoga”.

Dende a FGAMT-CIG reiteraron que os recortes xa acometidos empeoran un servizo que non cumpre sequera as recomendacións da Organización Mundial da Saúde que aconsella unha ambulancia de "Soporte Vital Básico" por cada 25.000 habitantes e unha ambulancia de Soporte Vital Avanzado por cada 120.000 habitantes. Unha rateo que cidades como Vigo ou Pontevedra superan amplamente. “Isto xa non é pasar ao segundo mundo, senón directamente ao terceiro”, aseveraba o responsábel de Transportes da CIG, Xesús Pastoriza.

Pola súa banda, Christian López Carmona, Secretario Comarcal da FGAMT-CIG en Lugo, insistía nesta cuestión ao asegura que “estes recortes, non teñen xustificación técnica e responden á política de desmantelamento de servizos públicos que está a levar a cabo o goberno do PP amparándose na crise”

Unha medida con consecuencias laborais

A FGAMT-CIG oponse de xeito frontal a esta rebaixa na calidade dos servizos básicos á cidadanía, mais advirte das consecuencias que a medida terá no ámbito laboral. Segundo os cálculos realizados pola Federación da CIG no prazo dun ano poderían desaparecer un terzo dos postos de traballo que actualmente existen neste sector.

Neste senso, López Carmona sinalou á difícil situación laboral que promoveu a patronal do transporte de enfermos e accidentados no ámbito galego, ao negárense a asinar a revisión salarial comprometida no anterior convenio colectivo autonómico para o sector, con vixencia até o 31 de decembro de 2010. “O obxectivo da folga é o freo do recorte de servizos anunciado pola Consellaría e a obriga de asinar as táboas salariais e sentar a negociar o seguinte convenio colectivo por parte da patronal”.

Caravanas de vehículos e protestas nas cidades

Aproveitando a xornada de folga e co obxecto de dar maior visibilidade a un paro desvirtualizado polos abusivos servizos mínimos, traballadores/as e sindicalistas promoveron caravanas de vehículos que percorreron os distintos centros de saúde. Ademais realizouse un reparto masivo de folletos informativos para explicar á cidadanía as consecuencias do recorte nos servizos prestados polas ambulancias.

No caso de Vigo celebrouse unha manifestación que percorreu as principais rúas da cidade e na que participaron máis de 300 traballadores e traballadoras, así como representantes sindicais. A marcha rematou diante da delegación provincial do Sergas, onde os afectados mantiveron unha entrevista coa súa responsábel. “O único que fixo foi tomar nota das nosas reivindicacións para trasladarllas aos responsábeis autonómicos”, comentan dende a FGAMT-CIG de Vigo. Os representantes sindicais tamén solicitaron unha entrevista coa propia conselleira de Sanidade para que lles traslade en persoa os motivos que levaron ao seu departamento a recortar os servizos.

Novo calendario de mobilizacións

Dende a CIG lanzouse unha chamada á Xunta de Galiza para que dea marcha atrás neste novo ataque aos servizos públicos e paralice os recortes anunciados. No caso contrario, os sindicatos advirten que a vindeira semana manterán novas xuntanzas para elaborar un calendario de mobilizacións “que será moito máis duro”.

PP quer privatizar o SPDCIF

2011-09-02T17:02:00.000+02:00

Os representantes dos catro comités provinciais do SPDCIF
na rolda de prensa celebrada onte pola mañá na CIG

Onte, día 31 de agosto, os representantes dos catrocomités provinciais do Servizo de Prevención e Defensa Contra IncendiosForestais (SPDCIF) compareceron nunha rolda de prensa para denunciar a campañade desprestixio que a Xunta de Galiza está a levar a cabo contra os brigadistase o resto de persoal do servizo co obxectivo de xustificar a súa eliminación,trasladando así as tarefas de prevención e extinción de lumes a novas empresasque se irían crear através do Clúster da Madeira. Se xa a dirección dos dispositivosestá privatizada desde hai tempo, os últimos movementos claramente conducentesa desfacerse do servizo producíronse xusto antes do inicio da campaña delumes, cando a Xunta pretendeu eliminar pola porta de trás 150 postos depeón forestal.

Pero a estratexia daXunta non para aí: complétase con contratacións através da empresa públicaSeaga, que permite contratos máis precarios; coa disponibilización de materialdeficiente ou, directamente, coa falta do material mínimo; co incumprimento do convenio;co desvío de material e medios para outros usos (caso do"chascarrillo" do alcalde de Compostela, Gerardo Conde Roa); e,nomeadamente, coa falta de formación. “Trátase de dar a imaxe, de cara áopinión pública, de que este servizo non serve, que non cumpre co seucometido, que os seus traballadores son incompetentes e que non teñenformación”, afirmou Fernando García, da CIG, engadindo que “o persoal quetraballa no SPDCIF accedeu a ese servizo a través de procesos selectivos, estánreclamando formación que non lles dá a administración nin a través da EGAP nina través da Academia Galega de Seguridade, as propias organizacións sindicaisfacemos cursos porque se demanda esa formación que non se lles presta”.Formación, por certo, que é un dos elementos clave que vimos tamén demandandodesde o CAE 112.

Diante desta tentativa do Partido Popular de utilizar o poder e a Xunta para desfacerse dos servizos públicos que son esenciais para a cidadanía e para o medio natural, o persoal do Centro de Atención de Emerxencias 112 Galiza manifesta, desde xa, o seu apoio absoluto ao persoal do SPDCIF, tal como nos últimos tempos ten manifestado tamén o seu apoio aos compañeiros de Seaga, de Grumir e, mais recentemente, do transporte sanitario, contra os intentos dos especuladores do PP de desfacerse ás caladas do que son a día de hoxe as súas responsabilidades de governo.

+ info

Un ano de Telemark no 112: nada a celebrar

2011-09-01T02:11:00.000+02:00

Hoxe cúmprese o primeiro ano de Telemark-Spain SL como empresa concesionaria da xestión do CAE 112 Galiza. Hoxe estarán de celebración na sé da empresa en León, e quererán trasladárnola a nós e facer que os traballadores e as traballadoras participemos dese orgullo de empresa. Pero dificilmente será así. Dificilmente participaremos dese orgullo cando o que nós vemos é un retroceso constante nas condicións laborais e nas facilidades de conciliación da vida familiar e persoal de cada un de nós coa nosa vida laboral. Porque, desde a chegada de Telemark, non só non se verificaron os acordos a que se tiña chegado coa anterior empresa e coa Xunta, senón que se ten posto perfectamente de manifesto a connivencia entre Xunta e empresa para limitar e até eliminar completamente aqueles avances significativos da anterior etapa do 112.

Comezaron exixíndonos reducir o noso tempo de xestión da emerxencia. Non porque o tempo fose moi elevado (xa que o 112 de Galiza ten un tempo medio de atención da chamada e de xestión da emerxencia por baixo do tempo medio de xestión noutros 112 da Unión Europea), senón porque, atendendo máis rápido poderíamos atender máis emerxencias por xestor e así sería necesario menos persoal. Pouco lle importaba a Telemark que iso redundase nunha perda de calidade do servizo e que, deste modo, o CAE 112 ficase descuberto en momentos de concentración de chamadas e, portanto, se colapsase e deixase de prestar o seu servizo. O único que lles interesaba era reducir o número de salarios a pagar, para seguir cobrando o mesmo da Xunta e así aumentar a marxe de beneficios. A nosa denuncia deste feito freounos polo momento, pero esa visión que non ten en conta a imprevisibilidade dun centro de emerxencias continuou aí.

Tanto así que, inmediatamente despois, confesaron que lles proían as nosas condicións horarias, e o feito de que traballemos menos horas do que marca un convenio de telemarketing que nós vimos rexeitando desde hai anos. A redución de horas de traballo por cada traballador permítenos estar máis descansados e menos estresados á hora de atender emerxencias. Pero á empresa isto deulle igual. Porque se cada traballador traballa mais horas (polo mesmo salario), necesita menos persoal e pode aumentar a marxe de beneficios - outra vez. E o mesmo pasou coa adscrición de turnos, onde fixeron o que lles deu a gana sen preocuparse polas consecuencias - algunhas das cales aínda están por ver.

Tamén desde o inicio puidemos comprobar que non estaban dispostos a pagar correctamente os salarios. Dedicáronse a facer diferentes tipos de nóminas sen motivo, todas diferentes e todas mal, con persoal que traballa máis e cobra menos e á inversa, con persoal que traballa as mesmas horas e no mesmo posto, pero cotiza diferente, con conceptos inventados e, como mínimo, moi cuestionábeis, etc.

Despois dedicáronse a dubidar da calidade do servizo. Mentres diante dos medios de comunicación a Xunta e o propio 112 mostraban as excelentes cifras e os ratios de atención, e as enquisas de satisfacción cidadá que valoraban moi positivamente o traballo do persoal do 112, a empresa comezou a entregar valoracións negativas do noso traballo acompañadas de ameazas de despedimento e degradacións a aquelas persoas que se opuñan ao seu estilo prepotente de xestión do 112.

Por riba de todo isto, reapareceron nas nóminas conceptos absorvíbeis que tíñamos erradicado na anterior etapa através dun acordo entre empresa e comité de empresa. Ademais de non pagar o acordado, o que se paga non é consolidado e absorbe subas de IPC, etc., que fan que o noso poder adquisitivo se teña estancado desde hai anos.

Se a isto sumamos o fomento da división interna entre os compañeiros; as ameazas de despedimento; as negativas a cumprir aquelas melloras pactadas e recollidas nas actas correspondentes; a ausencia dun plano de formación que xustifique a nota escandalosa que, durante o concurso, a Xunta lle deu nese apartado da oferta empresarial; as cacicadas e graves irregularidades producidas durante o período de eleccións sindicais e o seu intento de crear unha candidatura claramente pró-empresa utilizando para iso censos inflados e irregulares; a chulería e a prepotencia de Sebastián Arancio e a incapacidade reiterada de Pedro Osorio; e a insistencia infantil en que temos obrigatoriamente que estar contentos e agradecidos de ter traballo e de que eles sexan tan estupendos... como se supón que debe ser a nosa valoración do primeiro ano de Telemark no 112?

Xa sabemos que a empresa ordena e manda, que fai e desfai. Que executa ordes e modifica as nosas condicións segundo lle interesa máis, aínda que o servizo perda calidade. Por iso dicimos que a empresa ten a culpa. Pero tamén somos conscientes de que a empresa necesita o visto bon e o apoio dun Alfonso Rueda despreocupado e desaparecido, dun Santiago Villanueva neglixente e dun Juan José Muñoz maleducado e que ten mostrado en diversas ocasións o seu desprezo absoluto polo 112 e o seu persoal. E por iso dicimos que a Xunta é irresponsábel. Porque subcontratar non pode equivaler a deixar á súa sorte os servizos públicos, esquecerse do persoal que os presta e facer como se non pasase nada cando aparecen conflitos laborais que tocan directamente a un servizo esencial. Se a calidade do servizo se resinte pola xestión especulativa que a empresa leva a cabo, a Xunta non pode obvialo, non pode negarse a intervir nun servizo que ela mesma ten a obriga legal de prestar. E isto é, xustamente, o que está a facer a Xunta de Galiza. Pois, non hai nada a celebrar; non estamos de parabéns. E, se nós mesmos somos responsábeis, non podemos permitirnos outro ano así.

Mais neglixencias da Xunta do PP: Pladiga

2011-08-22T09:45:00.000+02:00

O Xornal de Galicia estase a converter no principal delator das neglixencias da Consellaría de Medio Rural no que ten a ver coa campaña de lumes deste verán, dando voz ao persoal de Seaga e mostrando como a deixadez do governo galego se traduce nunha perda directa de cualidade do servizo. Vexamos:

Un lume ás portas de Baiona, este verán.

Segundo a última nova publicada o día 20 de agosto, a Consellaría de Medio Rural tería carecido durante todo o mes de xullo e parte de agosto dos avións lixeiros que se utilizan para coordinar a extinción de lumes forestais, malia que o uso deses mesmos avións xa fora anunciado na presentación do Pladiga 2011. A Xunta defende que os avións estiveron activos durante a época de máximo risco, pero tanto o persoal de Seaga como os seus representantes sindicais veñen denunciando que "non houbo ningún medio aéreo de coordinación desde xullo até ao pasado 11 de agosto". Durante ese tempo, quen cubriu esa tarefa de coordinación aérea foron dous helicópteros de Seaga, un con base en Queixeiro e outro en Castromaior (este último, o do "chascarrillo" de Conde Roa). Isto non só impediu que eses aparellos realizasen operacións de combate directo ao lume, senón que impediu tamén que as brigadas desas bases puidesen traballar nesas zonas de lume. E por que estaban nesas bases? Porque precisamente durante a campaña de máximo risco de incendios, a Xunta tivo a ocorrencia de pechar todas as bases de Seaga para aforrar custos.

Os traballadores do 112 puidemos comprovar as consecuencias directas desta neglixente xestión da Consellaría de Medio Rural, dirixida por Samuel Juárez. Mesmo que fose só através do contacto telefónico que debemos facer cos departamentos provinciais do 085, quedou claro o desbordamento total e absoluto dos servizos de coordinación de lumes. Pero sabemos tamén que o tema non termina aí. Que non se trata dun desbordamento puntual, senón dunha vontade clara de reducir os medios para que a súa ineficacia obrigue a privatizar o Pladiga, tal como quere o propio Samuel Juárez (o mesmo que ordenou o apagón informativo sobre os lumes forestais), que pretende dar entrada a "empresas externas". Por iso se demorou a posta en marcha dos operativos das brigadas de extinción e nos primeiros momentos da campaña esas tarefas foron asumidas por equipos dos Grumir e de Voluntarios de Protección Civil; e por iso foron desmanteladas as Brigadas de Investigación Forestal que están encarregadas de analisar as causas dos lumes; e por iso se reduciu un 56% o investimento público para a roza de montes, segundo denunciou a FGAMP. O obxectivo: facer pasar a empresa pública Seaga por inoperante e cara (aínda que a Xunta deixou sen gastar 256 millóns de euros provenientes da UE que debían ser usados actuacións no medio rural) e despois, seguindo os desexos dos especuladores das emerxencias, privatizar o servizo.

Folga no sector das ambulancias

2011-08-19T16:00:00.002+02:00

Pilar Farjas, Conselleira de Sanidade

O próximo día 8 de setembro, entre as 0 e as 24 horas, o persoal das empresas aderidas ao convenio galego de transporte de enfermos e accidentados en ambulancia irá á folga. Anunciárono hoxe mesmo, através da CIG, os propios traballadores, que consideran que a folga é o único que camiño que lles deixa unha patronal que non quere cumprir o convenio pactado nin negociar un novo e que, ademais, anuncia recortes durísimos da man da Consellaría de Sanidade nun servizo público esencial.

Desde o Comité de Empresa do CAE 112 Galiza só cabe apoiar a folga do sector das ambulancias e relacionar precisamente a situación insustentábel deses traballadores co desprezo xeral que o governo galego manifesta diariamente pola xestión das emerxencias e o socorro á poboación. Estas situacións de diminución radical dos cadros de persoal son normais cando se entregan os servizos públicos a empresas privadas que o único que procuran é o lucro, canto mais directo e máis escandaloso, mellor. | + info

Continúa o menosprezo do PP polas emerxencias

2011-08-18T19:05:00.002+02:00

O do Partido Popular co tema das emerxencias non dá respiro. Cada día sorpréndenos cunha nova diferente, orixinal, que sería incluso graciosa se non fose polo triste e indignante que na realidade é. E a última, nesta ocasión, provén dun tema que denunciou Xornal de Galiza e do que nós nos fixemos eco: aquilo do señor Conde Roa tentando presumir de poderío diante dos técnicos da Copa Davis, levándoos en helicóptero á Cidade da Incultura. O malo é que o helicóptero en cuestión estaba de servizo: tanto así que no medio da intrépida expedición tivo que deixar os señoritos no Gaiás para desprazarse a Silleda, onde se producía un incendio forestal deses que a Xunta non considera importantes e ten a ben ocultar.

E, claro, a xente pregunta. Ten esa teima: ser curiosa e preocuparse de onde se meten os diñeiros dos seus impostos, gastados á toa en pagar empresas privadas de emerxencias que despois se dedican a pasear alcaldes e técnicos. E Conde Roa négase a contestar: "Yo comento noticias serias, no chascarrillos" que é tanto como dicir aquilo de "quítame allá esas pajas". Total, como a loita contra os lumes forestais está tan sobrada de medios... Pois menos mal que a Davis se foi de Compostela levando consigo o seu delirio de 2 millóns de euros en gastos, porque se chega a celebrarse no Gaiás, o alcaldiño é capaz de sacar peito e todo e tomar como costume ese chascarrillo de usar os helicópteros de Seaga.

Actualización | Xornal de Galicia, 19 de agosto.

O BNG pedirá "explicacións" polo uso de Conde Roa dun helicóptero contraincendios. Rafa Villar, edil do BNG de Santiago, cualificou onte como “aberrante” o uso por parte do Concello de Santiago dun helicóptero contraincendios para trasladar á Cidade da Cultura ao alcalde, o popular Gerardo Conde Roa, xunto a técnicos da Copa Davis o pasado 26 de xullo. Nesas datas o Gaiás optaba a ser sede da semifinal do torneo de tenis entre Francia e España, aínda que finalmente Córdoba foi a cidade elixida para celebrar ese evento deportivo. “Parécenos lamentable ese uso dun medio destinado a combater os lumes en plena campaña de máximo risco de incendios”, indicou o nacionalista, que pedirá “explicacións” ao respecto.

Conde Roa levou os ténicos da Davis ao Gaiás nun helicóptero contraincendios

2011-08-17T10:25:00.001+02:00

O Concello compostelán asegura que a aeronave pertencía “a unha empresa privada” e "para nada dependía" do servizo de loita contra o lume

Un helicóptero antiincendios / NACHO GÓMEZ

O alcalde de Santiago, o popular Gerardo Conde Roa, trasladou os técnicos da Copa Davis á Cidade da Cultura nun helicóptero dedicado a reforzar o dispositivo contra incendios o 1 de agosto, en plena época de máximo risco. O rexedor levou a comitiva á Cidade da Cultura, que optaba a ser sede da semifinal do torneo de tenis entre Francia e España, nun aparello da base do servizo de extinción de Castromaior, xestionada pola empresa pública Servizos Agrarios galegos (Seaga), unha das 12 bases que a Xunta pechou, para reducir custos, durante esta precampaña de loita contra os lumes.

Fontes do Concello compostelán, que fixo a contratación do helicóptero, aseguran que o mesmo “pertencía a unha empresa privada” e “para nada dependía do servizo de incendios”. Non obstante, Xornal constatou que o traslado da aeronave, que se intentou levar en segredo, xerou un gran rebumbio entre o persoal de Seaga, que incluso protestou ante esta situación. En todo caso, é certo que estes aparellos para a loita contra o lume son contratados por varios anos a unha empresa privada e non son medios propios da Xunta de Galicia.

Segundo puido saber Xornal, o helicóptero tivo que partir cara un incendio despois de deixar no Gaiás os pasaxeiros, que tiveron que regresar a Santiago por outros medios. E é que esa xornada foron mobilizados diversos dispositivos para extinguir un incendio forestal que calcinou 78 hectáreas de monte no municipio pontevedrés de Silleda.

Diversas fontes consultadas engadiron que o helicóptero procedente de Castromaior realizou o voo á Cidade da Cultura sen a bolsa para portar auga da que habitualmente dispón. Esta visita ao Gaiás non foi difundida polo Concello de Santiago, que dous días despois recibiu a noticia de que finalmente Córdoba era a cidade elixida para acoller as semifinais da Copa Davis de tenis entre Francia e España.

Fonte: Xornal de Galicia (17-08-2011)

Governo do PP: dous mortos e moita cara.

2011-08-13T13:07:00.001+02:00

Onte, 12 de agosto, cumpriuse un ano da morte de Xulio e Rodrigo, os dous brigadistas de Seaga que perderon a súa vida nun incendio en Fornelos de Montes. Naquel momento, a CIG xa acusara á Consellaría de Medio Rural de enviar os medios de Seaga ao monte sen o correcto equipamento e en condicións de máxima precariedade. Un ano máis tarde, denunciamos que a situación non só non mellorou, senón que os contratos continúan a precarizarse cada día, mentres as circunstancias daquel tráxico accidente continúan sen estar claras. Por que?

Pero non pasa nada. Ao contrario: a Xunta continúa a pensar que as emerxencias son un tema menor e molesto, e prefere non xestionalas. Á privatización continuada de servizos como as propias brigadas, o 061, o 112 e outros através de chiringuitos e fundacións escuras como a AXEGA, a Fundación 061 e Seaga, únese a constante restrición de medios humanos inclusive naqueles departamentos que "aínda" dependen do governo galego. Aí van soamente dous exemplos desta última semana: por unha banda, segundo ven de denunciar a CIG onte mesmo, a Xunta procederá á supresión de cinco ambulancias do 061 que atendían os concellos de Baiona, Ponteareas, Marín e Vigo, e tamén a comarca da Mariña lucense. Por outra banda, axentes da UPA de Ourense, onde onte mesmo se rexistraron graves incendios que obrigaron a decretar o nível 1 de alerta, queixáronse da escaseza de persoal e de que, precisamente onte, só houbo sete axentes pola mañá e dez pola tarde para atender as tarefas de prevención e investigación de lumes de toda a província.

E, mentres tanto, os medios de información ao servizo do PP, nomeadamente La Voz de Galicia e El Correo Gallego, a faceren propaganda barata con pallasadas do tipo "Guerra total de Rueda y Juárez para acabar con los incendios". E non falemos xa de que Medio Rural se nega a informar de calquera lume que non supere as 20 ha. De modo que "Guerra total". Xa se ve.

Continúan privatizacións nas emerxencias

2011-08-09T01:23:00.000+02:00

PSOE e PP continuan a privatizar servizos de atención de emerxencias. Desta vez será o Servizo de Apoio á Dirección de Atención de Emerxencias da Ertzaintza, que era realizado por axentes dese corpo de seguranza basco no centro do 112 SOS Deiak e que agora deberá ser asumido precisamente polo persoal precarizado do 112 basco. Deste modo, o governo de Euskadi deixará o seu propio corpo de policía fóra da atención do 112, continuando a política de privatización de servizos públicos esenciais e avanzando ao mesmo tempo no engordamento de empresas que se enriquecen cobrando por servizos que os gobernos de PP e PSOE non queren asumir. Os sindicatos bascos LAB e ESAN xa se opuxo a este novo vaciado da Ertzaintza e ao alargamento das contratas con empresas privadas. + info

CIG oponse á reforma da negociación colectiva

2011-06-20T10:06:00.000+02:00

Arredor de 1.500 delegados e delegadas da CIG participaron nunha multitudinaria asemblea para analizar as consecuencias da reforma da negociación colectiva. Antolín Alcántara, secretario confederal de negociación colectiva, e Suso Seixo, secretario xeral, explicaron os pormenores da reforma e as consecuencias que esta terá para a clase traballadora galega. Ao remate, e tras das intervencións dos asistentes, saíron en manifestación polas rúas compostelás, para reclamar "Unha negociación colectiva ao servizo da clase traballadora". Ler +

112 apoia concentracións de Telemarketing por un convenio digno

2011-06-09T17:12:00.000+02:00

Desde o 112 seguimos con interese os movimentos relacionados co novo convenio colectivo de Telemarketing - iso que agora chaman Contact Center para despexar a mala prensa da palabra telemarketing. Nun momento en que a patronal está a lanzar, através da CEOE, unha ofensiva desbocada para acabar coas melloras laborais atinxidas polos traballadores nos últimos anos, a patronal de telemarketing (ACCE) mantén bloqueado un convenio que xa expirou en 2009, exixindo despedimento libre para persoal indefinido e temporal e rebaixa salarial.

Desde o 112 levamos sostendo historicamente que o servizo de atención de emerxencias non debería estar sometido a este convenio colectivo. Non obstante, na medida en que as empresas que xestionaron ou xestionan o 112 non recoñecen a especificidade do servizo de emerxencias, non podemos desinteresarnos das reclamacións dos traballadores de telemárketing contra a ACCE. Estas reclamacións están agora nun momento quente, con varios despedimentos. A mobilización continúa.

Andalucía: mais precariedade

2011-06-05T02:01:00.000+02:00

112 Andalucía

Hoxe foi denunciada a nova polos traballadores do 112 e do 061 de Andalucía: o governo andaluz saca a concurso público a concesión da explotación dos dous servizos para toda Andalucía – nada menos que por 4 anos! Continúase, portanto, coa política de privatizacións que practican tanto o PP como o PSOE, e que ten dúas consecuencias directas e clarísimas: 1ª) o aumento do prezo do servizo, que non se debe aos salarios dos traballadores nen repercute neles, senón que acaba engrosando as contas de empresas de telemarketing que, aínda que cambien de nome, son as mesmas que abusan laboralmente dos seus empregados; e 2ª) a precarización do servizo, cuxos traballadores quedan sometidos a empresas cuxa lóxica é a da máxima redución de custos para aumentar os beneficios e que, portanto, non dubidan en promover despedimentos e recortes de planteis como os que hai só uns meses estivemos a punto de sofrer no 112 de Galiza. A precariedade nos servizos acábase pagando. Pero, como coa crise, non o pagan os responsábeis, senón os de sempre.

Non á Lei da Familia do PP

2011-05-24T21:38:00.000+02:00

Mulleres protestando contra a Lei da Familia do PP no Parlamento de Galiza,
antes de seren desaloxadas. / Foto: Xoán Rei

O Comité de Empresa do Centro de Atención de Emerxencias 112 Galiza manifesta, tal como ten feito reitaradamente a Confederación Intersindical Galega, o seu absoluto rexeitamento ao proxecto de Lei de Apoio á Familia e á Convivencia elaborada polo Partido Popular, que hoxe, 24 de maio, se debatiu no Parlamento Galego. Desta lei só podemos salientar o seu carácter retrógrado e o regreso á concepción da muller como colectivo que debe ser dirixido pola súa incapacidade para decidir na súa propia vida, recuperando a retórica da familia heterosexual e a da maternidade como papel e función vital das mulleres. A dereita recupera o rol tradicional da muller e o seu espazo de reclusión: a casa e a familia.

Nun servizo esencial como o 112, onde a maioría do persoal que xestiona as emerxencias son, de feito, mulleres, o único que podemos expresar é o noso desprezo absoluto por esta lei e polas crenzas que, acreditando tradicionalmente na inferioridade da muller a respeito do home, pretende volver estabelecer esquemas que custou anos superar. Temos claro que, se as mulleres conseguiron o recoñecemento do seus dereitos logo de séculos de discriminación, foi grazas ao seu activismo e resistencia. As mulleres demostraron ao longo deste tempo que non precisan de figuras paternas, do marido, nin sequera do estado, para acadar a súa independencia e foron quen de demostrar que ser nais é unha opción que só elas poden escoller.

Polo tanto, opómonos a unha lei que discrimina e reclúe a muller, que discrimina e desampara o colectivo LGBT, que desampara e re-criminaliza socialmente o aborto, e que se opón, no seu espírito, ao traballo feminino. No 112 somos unha maioría de mulleres demostrando que podemos facer calquera traballo tan ben como calquera home.

112 volve aos mitins de campaña

2011-05-19T11:26:00.000+02:00

Faixa despregada do 112 entre os asistentes ao mitin
112 Xunta Culpable

Xa o avisamos noutras ocasións. Se os responsábeis políticos da Xunta de Galiza non cumpren as promesas feitas ao persoal do 112 e non avanzan a solución que vimos procurando desde hai anos, o persoal do 112 participaremos activamente nas eleccións municipais para pormos de relevo a neglixencia da xestión do Partido Popular.

Momento en que Alfonso Rueda se decata da faixa despregada do 112

No mitin celebrado esta noite en Teo, Alfonso Rueda, responsábel da Consellaría da Presidencia, da que depende o 112, asistiu a un exemplo de cómo o persoal do Centro de Emerxencias temos pensado actuar nos próximos días. Estaremos en mitins e noutros actos de campaña para reclamar a atención dos votantes e simpatizantes do PP e informalos de verdade de cómo goberna o PP.

Ribeira: 112 presente!

2011-05-15T01:03:00.000+02:00

Faixa reclamando a implicación de Feijóo no conflito do 112

A campaña de visualización en campaña eleitoral continúa. Onte estivemos no mitin do Partido Popular de Ribeira, onde falaron dous dos responsábeis do conflito no Centro de Emerxencias de Galiza. En primeiro lugar, Manuel Ruíz Rivas, candidato á alcaldía e a persoa que no seu día, sendo voceiro do grupo parlamentar do PP e xusto antes das eleccións á Xunta que deron o poder ao seu partido, prometeu unha solución rápida á situación do 112. Polas súas promesas incumpridas estivemos en Ribeira denunciando o seu modo de facer: moito de prometer e nada de cumprir.

Momento en que somos apartados pola Policía Local entre as ameazas do seu xefe

Tamén falou Núñez Feijóo, o responsábel dos atropelos dos seus conselleiros, especialmente de Alfonso Rueda no que se refere ao 112. Por iso a faixa que despregamos poñía "Feijóo 112 Solución", reclamando que quen di ser presidente de todos se implique de verdade en apagar os lumes que os seus conselleiros van por aí prendendo. E todo iso malia a actitude hostil do xefe da Policía Local de Ribeira, moi preocupado con que a faixa ficase o máis retirada posíbel e lonxe de Feijóo, e que chegou a ameazarnos con demandas pola vía xudicial polo terríbel delito de estarmos na vía pública cunha faixa.

O coche de Feijóo detense diante da faixa do 112

"Rueda, sae e dá a cara"

2011-04-27T11:37:00.001+02:00

Este martes, como todos os martes do último mes, o persoal do 112 volveuse concentrar na rúa, nesta ocasión diante da Xunta de Galiza reclamando que Alfonso Rueda se faga cargo da solución do conflito, dado que tanto Juan José Muñoz, xerente da Axega, como Santiago Villanueva, director xeral de emerxencias, se teñen revelado como absolutamente incompetentes á hora de xestionar a problemática do 112. As últimas mentiras de Villanueva non só non convenceron a ninguén, senón que nos empuxan a seguir mobilizándonos de cara á campaña de eleccións municipais para as que quixeron silenciarnos. Pero nos non vamos ficar calados.

Valoración da comparecencia do Director Xeral de Emerxencias

2011-04-22T03:02:00.000+02:00

Santiago Villanueva, Director Xeral de Emerxencias.
Outro dos responsábeis directos do conflito no 112

De toda a serie de mentiras e de datos falsos cacarexados por Santiago Villanueva na comparecencia pola pregunta parlamentar apresentada polo BNG este martes 19, cumpre destacar unha falacia principal. Villanueva defendeu que todas as peticións dos traballadores tiñan sido resoltas coa adxudicación da contrata a Telemark-Spain e dixo, ademais, que "se agora hai outras peticións, non foron manifestadas". Do que parece que non quer darse por enteirado o Director Xeral de Emerxencias é de que non son "outras peticións", senón as mesmas, as que nos levaron a manifestarnos esa mañá na rúa, tal como vimos facendo continuadamente durante o último mes. Ningunha das peticións foi cumprida. Ao contrario: a situación empiorou substancialmente e a hostilidade do persoal da Xunta ao persoal que dá o servizo de atención de emerxencias chega a níveis insoportábeis.

Por suposto, interesa ao PP paralisar as mobilizacións antes das eleccións municipais. E paralisalas é ben sinxelo: só é necesario cumprir as promesas que eles mesmos fixeron no seu día, sen que ninguén os obrigase, através de Ruiz Rivas - entón voceiro parlamentar e hoxe candidato á alcaldía de Ribeira - e de Beatriz Mato, actual Conselleira de Traballo. Sen embargo, o PP opta por outra vía, que consiste en seguir incumprindo as súas promesas e dedicarse a tentar laminar e desprestixiar o noso protesto.

Por iso Villanueva responde que todo está solucionado coa contratación de Telemark - esa empresa que nada máis chegar ameazou con despedimentos baseándose en informes de calidade falsos e capciosos, que pretendeu degradar a compañeiros por non traballaren gratis nos seus días libres, que modificou substancialmente as nosas condicións de traballo, que negou a conciliación da vida familiar e laboral a varias compañeiras con menores ao cargo; a esa empresa que gravou chamadas persoais dos traballadores, que emporcou todo canto quixo o proceso de eleccións sindicais, e que nos sete meses que leva á frente do 112 xa motivou a interposición de varias demandas xudiciais e unha visita da Inspección de Traballo que está pendente de se resolver. Así é como resolve os problemas o PP?

E qué dicir da actitude covarde do conselleiro Alfonso Rueda, que primeiro reitera as promesas feitas no seu día por Mato e Ruiz Rivas e que, xusto despois, manda dicir á Dirección Xeral e á Axencia Galega de Emerxencias que non hai fondos disponíbeis e que a crise non permite excesos. Pero que excesos? É un exceso pedir o pagamento de salarios de 2007 ou a consolidación do que xa están a pagar de maneira irregular? É un exceso pedir que se regulen as gardas de 24 horas? É un exceso, acaso, exixir que a Xunta de Galiza faga unha aposta real polo mantemento do persoal que traballa no servizo público esencial do 112 e que na seguinte contrata podería ser despedido? Onde están os excesos? Ao contrario: o único que fixo o persoal do 112 foi abrir a man, ser comprensivo e paciente e seguir cumprindo coa súa obriga, que non é outra que prestar o mellor servizo posíbel á cidadanía, a miúdo máis alá dos medios materiais disponíbeis. Este é o pago que recibimos da Xunta: menosprezo, abusos, falsas promesas, mentiras e acusacións. Así, dificilmente se pode continuar.

Parlamento de Galiza: 112 presente!

2011-04-20T12:20:00.000+02:00

Momento da concentración de persoal do 112 diante do Parlamento de Galiza

Xa o dixemos noutras ocasións: a loita continúa. E onte continuou cunha nova concentración diante do Parlamento de Galiza contra a precariedade e contra as mentiras do PP e da Xunta de Galiza, ao berro de "O 112 cumpre, a Xunta non!". Ademais, o conflito do 112 chegou tamén ao interior do Parlamento, onde o deputado do BNG Alfredo Suárez Canal realizou unha pregunta parlamentar interesándose pola situación do servizo público que é o Centro de Atención de Emerxencias. Nesa liña, as preguntas de Suárez Canal dirixíronse a saber por que a Xunta abandonou o camiño de profesionalización e homologación do servizo de emerxencias aberto pola Lei de Emerxencias de Galiza e, polo contrario, optou pola externalización sen garantías e que aprofunda a precarización do persoal do 112.

Isa Moares sendo entrevistada pola Televisión de Galiza ás portas do Parlamento

A contestación de Santiago Villanueva, porén, foi tan ridícula como agardábamos [ver vídeo]. Primeiro tratou de deixar ben á empresa indicando que os indicadores de calidade se elevaron desde a súa chegada - dato ben curioso se se contrasta coas ameazas que sufriu o persoal precisamente pola calidade do servizo, ameazas que xa denunciamos aquí como irreais e baseadas máis nunha represalia que en datos reais (polo que di o señor Villanueva, tíñamos razón).

En segundo lugar, afanouse en facer pasar a subrogación interempresas por unha subrogación exixida no prego de condicións da contrata. Non é o mesmo, como moi ben sabemos os que traballamos no 112 e como xa temos explicado noutras ocasións: a primeira é unha medida de graza, froito de acordo entre as empresas que non ten por que volver acontecer no futuro; e a segunda é unha exixencia do concurso público que debe ser cumprida necesariamente e que unha vez introducida no prego de condicións non pode ser retirada en posteriores pregos, estabelecendo unha obriga para o futuro. Para Villanueva, sen embargo, o que a Xunta fixo foi garantir a contratación do 100% do persoal coa antiguidade máxima (mentira) e respeitando os acordos a que chegamos con anteriores empresas (outra mentira).

En terceiro lugar, Villanueva informou de que a empresa negociou e acordou co Comité de Empresa unha solución á cuestión das gardas de 24 horas. Outra mentira máis: esa negociación non se produciu nunca. O único que fixo a empresa foi comunicar que, dado que non necesitaba a activación de buscas, os ía suprimir temporalmente, até volver necesitalos. A estratexia da empresa foi clara neste caso: quitar o problema de diante, sen solucionalo. Porque o día que necesiten novamente tirar das gardas de 24 horas teremos de novo o problema acima da mesa, e sen resolver.

En cuarto lugar, Villanueva volveu insistir, como xa o fixo en diversas reunións connosco e através de Juan José Muñoz, xerente da AXEGA, en que a suba que nós reclamamos incluía as cantidades percebidas en concepto de pluses de traballo nocturno, domingos e festivos, o que é rotundamente falso. De novo, máis mentiras. Non contento con iso, comezou a compararnos con outros servizos de telemarketing, a pesar de que nós manifestamos sempre que o 112 debe ser considerado a todos os efeitos como un servizo público.

E, finalmente, dedicouse a recitar un rosario de melloras que a empresa tería aplicado ao persoal do 112, das cales todas están contempladas na lexislación, sen que poidan considerarse medidas graciábeis adoptadas pola empresa. De feito, das citadas, a únicas medida emprendida pola empresa sen que haxa imperativo legal é o seguro dental para os traballadores - que nós nunca solicitamos.

A conclusión de Villanueva é que todas as demandas do persoal de emerxencias foron atendidas e resolvidas através da adxudicación desta contrata á empresa Telemark-Spain, e que á medida que foron solucionadas esas peticións o persoal do 112 nos dedicamos a exixir outras melloras. En fin: unha grande mentira que engloba todas as demais. As exixencias do 112 mantéñense inalteradas desde 2007: cinco anos sen que se modificase a exixencia de suba salarial, nen a necesidade de subrogación real nen a necesidade de regular as gardas de 24 horas.

En calquera caso, o único que pode sacarse en claro da comparecencia de Villanueva é que a Xunta e nomeadamente a Dirección Xeral de Emerxencias se dedicou a parchear (e mal) un conflito que tiña moi fácil solución e no que os traballadores e as traballadoras do CAE estábamos dispostas a ser comprensivos cos prazos e a abrir a man debido a actual situación económica, e coa vista posta nun futuro a medio prazo. Dese medio prazo, Villanueva non di nada e limítase a sinalar que as nosas problemáticas laborais son cousa entre a empresa e mais nós. Pois non é así. O 112 é un servizo público e, como ben dixo Suárez Canal, a lei defíneo como un servizo esencial. E, polo tanto, a Xunta non pode desentenderse dos conflitos que se dan no 112. Mágoa que o modo de interesarse de Santiago Villanueva consista en ir ao Parlamento a ler unha folliña con datos falsos, a mentir descaradamente e a acusar ao persoal do 112 de pouca seriedade. Mágoa.

+ Vídeo da pregunta parlamentar interposta polo grupo do BNG e da resposta de Santiago Villanueva.

Outra vez se vulnera dereito á privacidade

2011-04-18T12:57:00.000+02:00

O día 3 de marzo deste ano, o Comité de Empresa solicitou unha Inspección de Traballo por causa da gravación das chamadas persoais do persoal de emerxencias por parte da empresa Telemark. A visita tivo lugar o día 14 deste mes, citando a inspección á empresa a unha posterior reunión para que explique esta cuestión. Desde o Comité de Empresa enviamos hoxe unha nova comunicación á Inspección, solicitando estar presentes para podermos demostrar que a gravación non se deu por erro nen por equivocación, senón á mantenta - coincidindo ademais cunhas eleccións sindicais onde a empresa se empeñou en ter un papel demasiado activo.

Despois de termos denunciado que a empresa facilitou os nosos teléfonos persoais á UGT durante as eleccións sindicais, agora gravan as nosas conversas. Unha vez mais, vulneran a nosa privacidade. Que será o próximo? Porque non esquezamos que na sala de emerxencias existen cámaras de videovixilancia das que non se deu conta ao Comité de Empresa, e que o mesmo acontece coa gravación das pegadas dactilares á entrada - ambos, temas dos que hoxe se solicitou un cumprido informe. Quedamos á espera.

Xunta de Galiza: 112 presente!

2011-04-14T20:18:00.001+02:00

Alfonso Rueda, o responsábel número 1 do conflito.

Hoxe pola mañá, persoal do 112 continuamos coa campaña de información a outros traballadores e traballadoras, tal e como vimos realizando nas últimas semanas. Nesta ocasión estivemos a informar e a repartir máis de 450 folletos informativos entre as 7h30 e as 8h00 ás portas na entrada dos edificios administrativos da Xunta de Galiza en San Caetano, xusto onde, o 19 de outubro de 2009, Alfonso Rueda, Conselleiro da Presidencia, nos prometeu unha rápida solución ao conflito nos termos que nós propúñamos. O feito de que aínda hoxe teñamos estado ás portas da Xunta só pode ter unha leitura: que as emerxencias e a súa xestión, a este PP e aos seus responsábeis lles importan mais ben pouco.

Como nos negan o noso: despilfarro (I)

2011-04-13T16:48:00.001+02:00

Santiago Villanueva e Alfonso Rueda durante a presentación da maqueta da nova sé do 112
Foto: Xoanma Porto / El Correo Gallego

Na última reunión mantida entre o Comité de Empresa, a Axencia Galega de Emerxencias e Telemark-Spain, Juan José Muñoz Iglesias, xerente da AXEGA, puxo como excusa a incapacidade económica do seu departamento para facer fronte ao pagamento das contías comprometidas no seu día co Comité de Empresa do 112 através da entón concesionaria, MkPlan 21. E iso malia que a referida contía supón apenas arredor de 150.000 euros anuais e malia a boa disposición do Comité de Empresa, disposto a negociar prazos. A excusa da AXEGA é que xa non dispón dun só euro do seu orzamento anual – dato, cando menos, sorprende se tivermos en conta que se acaba de facer pública a adxudicación do novo Centro de Atención de Emerxencias, que ten un prezo de 7 millóns de euros (mais outros 3,5 millóns para a plataforma informática), só uns meses despois de levar a cabo unha completa remodelación do actual CAE, por valor de 100.000 euros, que en breve ficará baleiro e sen uso. Enfin: máis unha mostra do modo como a AXEGA e a Dirección Xeral de Emerxencias e Interior xestionan o diñeiro público – tamén o noso.

Parlamento de Galiza: 112 presente!

2011-04-13T10:28:00.000+02:00

Na mañá de onte, 12 de abril, un grupo de traballadores e traballadoras do 112 estivemos concentrados diante do Parlamento de Galiza para facer ouvir as nosas exixencias. Através das palabras de orde "Non falta diñeiro, sobran ladróns", "Rueda, covarde, sal e dá a cara", "Non máis mentiras, queremos solucións" e o xa clásico "112: Solución", expresamos a nosa indignación polas mentiras recebidas por parte da Axencia Galega de Emerxencias e da Dirección Xeral de Emerxencias e Interior. A concentración fai parte da campaña de visibilización da problemática do 112 que, xunto coa campaña de información através dos medios de comunicación e das volantinas repartidas nos principais puntos de aglomeración de veciños, está a un importante éxito entre a cidadania, moi interesada - evidentemente - en desfrutar dun servizo de calidade que só pode conseguirse coa fidelización do persoal do 112 através das melloras laborais e sociais xa comprometidas polo actual governo e que aínda non se puxeron en marcha.

Informativos de RNE: 112 presente!

2011-04-10T23:43:00.000+02:00

Os protestos do 112 e a campaña de información cidadá están a dar os seus froitos. Hoxe, no informativo de RNE das 13h30, Óscar Valadares, do Comité de Empresa, tivo a oportunidade de explicar aos radio-ouvintes por que motivo nos atopamos nesta situación e tamén por que responsabilizamos en todo momento á Xunta de Galiza e nomeadamente á Axencia Galega de Emerxencias e á Dirección Xeral de Emerxencias e Interior e aos seus máximos responsábeis, Juan José Muñoz e Santiago Villanueva. Mentres a situación non se reconduza, teremos que continuar coa nosa teima de informar á cidadanía, que ten todo o dereito a saber cal é a xestión que fai o PP das emerxencias e do 112. Agora, mais que nunca, continuaremos informando.

2.500 panfletos apontan ao PP como responsábel do conflito

2011-04-08T23:32:00.000+02:00

Dixémolo moitas veces: estamos convencidos de que a solución ao conflito laboral do 112 depende exclusivamente da vontade dos seus responsábeis, tanto da empresa como fundamentalmente da Axencia Galega de Emerxencias, da Dirección Xeral de Emerxencias e da Consellaría da Presidencia. E por iso culpamos directamente da situación aos cargos políticos que están á cabeza destes organismos nos 2.500 folletos informativos que hoxe repartimos en diversos puntos da cidade de Compostela.

Reparto de material informativo diante da Praza de Abastos de Compostela

De mañá, tivemos ocasión de explicar a nosa situación e as súas consecuencias aos comerciantes e aos usuarios da Praza de Abastos, que mostraron un interese que nos anima a continuar denunciando publicamente as mentiras do Partido Popular en relación co 112.

Reparto de material informativo entre os asistentes ao Fontes do Sar

E xa de tarde, o reparto completouse entre os mais de 4.000 asistentes ao pavillón Fontes do Sar, onde, antes do inicio do partido do CAB Obradoiro tivemos tamén ocasión de conversar con algúns grupos de persoas para deixar moi claro quen son os responsábeis deste conflito. A boa acollida que estamos a observar tanto na leitura dos panfletos como nas charlas cos veciños só pode convencernos de que estamos no camiño certo, e de que é por aí por onde temos que continuar até recuperarmos o respeito que merecemos e até que se cumpran dunha vez as promesas que se nos fixeron.

Informando

2011-04-07T19:51:00.000+02:00

Este medio día, un grupo de traballadores do 112 fixemos un reparto de 300 panfletos informativos na entrada do edificio da CRTVG onde ten a sede o Centro de Atención de Emerxencias 112 Galiza, e puidemos explicar ás persoas coas que nos cruzamos cada día na entrada e na saída dos nosos respectivos postos de traballo as condicións de precariedade que seguimos soportando e as neglixencias e mentiras que temos que aturar por parte da Xunta de Galiza, da Axencia Galega de Emerxencias e da concesionaria Telemark-Spain. O feito de que aínda haxa algunhas persoas que pensan que o persoal do 112 é funcionario e ten unhas condicións de traballo normais demostra a necesidade de facermos esta campaña informativa que hoxe comezamos a pé de rúa e que se irá completando con novos actos de reparto e conversa nos próximos días. Os galegos e as galegas teñen que saber que a Xunta de Galiza é a responsábel absoluta das eivas que presenta o 112, tanto no servizo que presta como no trato aos seus propios traballadores.

112 presente na mobilización de Madrid

2011-04-05T23:11:00.003+02:00

Faixa da cabeceira da manifestación

Isa Moares e Óscar Valadares, en representación do Comité de Empresa do CAE 112 Galiza, estiveron presentes na mobilización que a CIG convocou conxuntamente con outros sindicatos de clase bascos (ELA, LAB, STEE-EILAS, EHNE e HIRU), cataláns (CSC), canarios (IC) e agoneses (OSTA) contra as reformas laboral e das pensións pactadas pola patronal, o Goberno español e os sindicatos estatais CC.OO. e UGT.

A nosa presenza nesta manifestación, celebrada hoxe, 5 de abril, en Madrid baixo o lema “Polo dereito a decidir as nosas condicións laborais e sociais”, e que reuniu mais de 6.000 traballadores (dos cales arredor de 1.500 correspondían á CIG), mostra novamente o compromiso do Comité de Empresa do 112 coa defensa dos intereses dos traballadores, que non pasan por atrasar a idade de xubilación, por ter que cotizar durante mais anos, porque lles reduzan as pensións, nin por todo o empeoramento das súas condicións que se deriva da reforma laboral. E demostran tamén que continuamos convencidos de que, diante dos ataques contra os traballadores - sexan ataques xerais como os citados ou sexan ataques particulares como os que estamos a sufrir no 112 con esta empresa e esta Xunta neglixentes - a única resposta é a mobilización. Se agardamos que outros se mobilicen por nós, perderemos a oportunidade. E estaremos perdidos. Por traballos dignos, para nós e para o resto de traballadores, mobilización: non hai outro camiño.

Dirección Xeral: 112 presente!

2011-04-02T14:03:00.000+02:00

Persoal do 112 diante da Dirección Xeral de Emerxencias

Na mañá onte, un grupo de 25 traballadores e traballadoras do CAE 112 Galiza estivemos concentrados diante da sé da Dirección Xeral de Emerxencias e Interior e da Axencia Galega da Emerxencias, ambas responsábeis pola xestión do 112. Exixíamos o desbloqueo das melloras que xa tíñamos pactadas e que agora nos queren negar, despois dunha reunión onde se os representantes destes organismos se dedicaron a mentir descaradamente. A Xunta colócase así á cabeza dos explotadores de Telemark-Spain SL, e procura, en lugar dun servizo público de calidade, un servizo de mínimos, neglixente, con persoal precarizado e pensando en fuxir do 112 en canto atope algun outro traballo mellor. Non nos serve a desculpa ridícula de que non hai diñeiro: a crise non a provocamos nós e os despilfarradores son eles, gastando os millóns de euros de orzamento dese departamento en calquera cousa menos en cumprir o que eles mesmos pactaron. Tentamos negociar, pero a nosa exixencia é firme e as condicións que nos queren impor son inasumíbeis. Non nos queda outra opción que continuar pola vía das mobilizacións. Adiante!

112 contra a precariedade

2011-03-30T22:20:00.000+02:00

Comezamos!

2011-03-26T16:24:00.000+01:00

Xa é triste que nos pretendan tomar por parvos. Pero, desde a reunión de onte coa Axega e coa empresa Telemark-Spain SL, máis triste é que, ademais, pretendan que lles estexamos agradecidos. Para que nos convocaron? Para mercaren unha paz social que significaría que nós mesmos entregásemos todo o esforzo feito até agora a cambio dunha esmola? Primeiro dixeron que xa cumpriran as nosas exixencias, porque xa temos a subrogación que queríamos - ou inclusive mellor, porque suprimiron o problema das gardas retribuídas e porque consolidaban unhas cantidades que nós demandábamos para 2007. Mentiras. Mais nada que mentiras, unha detrás da outra, que pretenden deixarnos a nós como preguiceiros que o único que queren é traballar menos e cobrar máis.

Diante disto, como non podía ser doutro modo, a nosa resposta xa é contundente: na Asemblea Xeral de traballadores do día 24 a negativa do persoal foi rotunda e sen fisuras. Até o de agora nós xa fixemos varios achegamentos, renunciando a algúns dos puntos da nosa primeira táboa reivindicativa e inclusive a cantidades que para nós son fundamentais e para a administración son esmolas. Aínda así eles prefiren o conflito e os problemas. En diante, xa que logo, mobilizarémonos na rúa e pola vía xudicial contra Telemark-Spain, SL e contra a Axencia Galega de Emerxencias cunha idea fixa: non serán eles quen nos digan cando temos que deixar de exixir o noso nen cando debemos darnos por satisfeitos. Queremos un traballo digno e que se nos trate con respeito e seriedade. E vamos traballar para conseguilo. Comezamos!

Redefinindo o alarmante

2011-03-21T19:52:00.000+01:00

Telemark-Spain continúa na mesma. Desde o seu desembarco no 112 hai xa 7 meses, as mentiras, os falseamentos, as acusacións e as ameazas fan parte da nosa rotina diaria. A diferenza é que nos últimos tempos parecen máis histéricos. E así, as mentiras tórnanse máis delirantes, as acusacións máis desvergoñadas e as presións contra o persoal do 112 máis ousadas.

Na última comunicación da empresa ao persoal de coordinación, dáse conta por primeira vez dos datos de “absentismo laboral” (do mes de febreiro), valorando que “supera con mucho la definición de alarmante”(!). E será catastrófico, pero se nos detivermos nas estatísticas que a propia empresa remite observamos que o absentismo se refire só a baixas de IT (28%), baixas maternais (23%), ingreso de familiares (16%), excedencias non retribuídas (14%), lactancia (7%), horas sindicais (7%), consultas médicas (1%), enfermidade (1%), acompañamento de familiares (1%), defunción de familiares (1%) e exames oficiais (1%). Todos estes motivos, ademais de estaren perfeitamente acreditados en todos os casos polo traballador, están tamén regulados polo convenio lixo que a patronal e as cúpulas de CC.OO. e UGT aprovaron no seu día e son, xa que logo, dereitos laborais dos traballadores e das traballadoras do 112.

Desde o Comité de Empresa queremos denunciar, por unha banda, o que segundo todos os indicios parece outra alarmante tentativa de aumentar o lucro á custa de reducir eses dereitos; e, por outra, a hipocrisía e o máis que alarmante machismo dunha empresa que se autodefine como socialmente responsábel mentres se queixa constantemente do número de baixas maternais e mesmo tenta eliminar o dereito á redución de xornada para as nais e os pais que se acollen a ese outro dereito. Esperamos – aínda que tememos o pior – que se trate simplemente dunha desafortunada saída de ton de Pedro Osorio (outra máis) e que Telemark non estexa querendo presionarnos por esta nova vía para non irmos ao médico cando o necesitemos, para non termos fillos cando decidamos, para non facermos exames oficiais ou para que o os membros do Comité non utilicen as ridículas 15 horas mensuais de que dispoñen para realizaren un traballo sindical –á vista está– tan necesario.

Telemark quer diálogo?

2011-03-18T03:01:00.000+01:00

Despois de non apresentarse á cita de conciliación no SMAC este luns, Telemark di sentirse sorprendida e disgustada por termos escollido a vía do confronto legal, e informa agora da súa vontade de negociar os puntos quentes da situación laboral no 112: consolidación salarial, modificación substancial das secuencias e o acordo das condicións previas.

Desde o comité de empresa cremos que foi a unidade demostrada nas recentes eleccións e no apoio á iniciativa legal contra Telemark o que levou a empresa a aceptar unha reunión para reconducir a situación. Para nós, esa recondución só pode pasar por recuperarmos a secuencia tal como foi negociada e aceptada pola empresa anterior. Non pode ser doutro xeito.

Por outra parte, é tamén fundamental o recoñecemento, por parte da empresa, das condicións laborais e sociais que estaban en aplicación na anterior contrata grazas aos diversos acordos concretados entre o Comité de Empresa e MkPlan 21. Despois de nos acusaren de mentir e de tentar darmos gato por lebre nunha tradución ao español á que nós accedimos (sen termos ningunha obriga neste sentido), é fundamental que Telemark recoñeza o seu erro e acepte por fin que antes de eles chegaren xa existía o 112 e nós, os seus traballadores, xa loitábamos polos nosos dereitos e pola mellora progresiva - pero substancial - das nosas condicións de traballo.

E, finalmente, non menos importante será a cuestión da consolidación salarial. Tanto Telemark como a Xunta, através da DXEI, tentaron vendernos no seu momento unha suba salarial que non pode considerarse como tal se se fai a base de complementos absorvíbeis e non consolidados. Se queren incluir conceptos como "conta convenio" ou "mellora voluntaria" nas nosas nóminas como política salarial da empresa, nós non nos oporemos sempre que esas cantidades se apliquen acima das cantidades consolidadas que negociamos e que son, por iso mesmo, nosas. A empresa dixo recentemente que a situación non depende deles. Pero esa argallada xa non é nova para nós. MkPlan xa o tentou antes e saiulle ben. Pero non volverá repetirse: a consolidación depende de Telemark enteiramente. Se non é así, como se insinúa, e depende de terceiros, entenderemos que a administración ten neste caso moito a ver coas cantidades que cobramos, o que nos colocaría inmediatamente diante dunha situación ben diferente.

Nós non exiximos máis que o que nos corresponde. Pero tampouco pasamos por menos. Entendemos que as nosas reclamacións son ben modestas, e non estamos dispostos a continuar rebaixándoas. Mais unha vez: dignidade salarial e estabilidade laboral!

Fica claro: a loita continúa

2011-03-07T23:27:00.001+01:00

Por fin. Dicimos “por fin” porque despois de todo este tempo ocupados nun proceso que a Telemark e a cúpula de UGT se empeñaron en alongar e alongar, hoxe tiveron lugar as eleccións sindicais no 112, cos seguintes resultados: 66 votos emitidos (79'5% do censo), dos cales, 1 en braco, 1 voto nulo e 64 votos para a candidatura dos traballadores representada pola CIG.

As cifras ofrecen unha única leitura posíbel do que xa foi o proceso mais ponzoñoso e ridículo que se viviu no 112: finalmente, impúxose a vontade dos traballadores de seren representados por un Comité libre da estratexia de pacto barato de UGT e dos mangoneos ás agachadas de Telemark. Pendente queda aínda a resolución da Axencia Española de Protección de Datos a respeito das chamadas de Ana Blanco (Telemark-FesUGT), pero unha cousa fica clara: por riba das lexítimas preferencias persoais, o persoal do 112 evidenciou hoxe que a única maneira de termos máis forza que o patrón é estarmos máis unidos. Só deste modo se pode dar resposta na única lingua que entenden: a mobilización que non cala e que se impón sobre o escenario que eles queren: ese que ten convertido a atención telefónica no sector máis precario de cantos haxa, ese no que os obreiriños son persoas grises que falan como máquinas e que aguantan todo, todos os días. Pero nós non somos así. Exiximos dignidade e a mellor proba está na candidatura máis ampla xamais apresentada e no novo Comité que se constituirá nos próximos días, composto por Isa Moares, Óscar Valadares, Susana Camba, Puri Torres e Carlos Barral.

Votamos porque cremos na dignidade

2011-03-05T00:19:00.000+01:00

A dous días das eleccións a Comité de Empresa do 112 é posíbel preguntarse para que votar. Para que votar se hai unha única candidatura presentada? Para que votar se, voto mais ou menos, o resultado vai ser que os cinco membros do Comité de Empresa que van ser elexidos corresponderán á candidatura dos traballadores suportada pola CIG? Para que votar se, unha vez eliminada a posibilidade de participación da empresa, non hai candidatos que tombar nen aos que se opor?

Parece que non hai grandes causas para votar. E, con todo, existen motivos que empuxan a facermos, o día 7, un exercicio de responsabilidade. En primeiro lugar, votar pola lista dos traballadores significa validar o apoio dado por todos os seus integrantes, os corenta e nove, á unidade sindical frente ás inxerencias da empresa. De nada serviría ese apoio na confección da candidatura se, nas votacións, non se renovase ese apoio. En segundo lugar, votar significa apoiar a decisión valente e responsábel do compañeiro Carlos Martínez, que tras traballar tres anos intensamente como delegado por CC.OO., decidiu agora unirse á candidatura única para favorecer a unidade sindical. En terceiro lugar, votar significa dicir rotundamente non ao modelo de sindicalismo que primeiro vai falar co patrón e despois co traballador, como quedou demostrado coa penosa intervención de UGT neste proceso. E, nesa liña, votar equivale tamén a visibilizar que o que nós queremos é un comité que, malia os erros cometidos, saiba estar sempre fronte á empresa e sempre sometido ás decisións da maioría nas asembleas de persoal. En definitiva: votar o día 7 equivale á primeira das mobilizacións que teremos que levar adiante para defender aquilo que xa é noso e para conseguir aquelas melloras que en xustiza nos corresponden. O día 7 vamos votar porque queremos transmitir unha mensaxe clara: no 112 continuamos unidos pola adecuación das nosas condicións laborais ao servizo público que prestamos.

Telemark dificulta traballo sindical

2011-02-22T20:29:00.000+01:00

Xa temos denunciado en diversas ocasións que, con Telemark na xestión do CAE 112, as reunións de traballo entre a empresa e a representación dos traballadores se viron moi reducidas, dándonos cada día novas escusas – cada vez mais inverosímeis. Ademais, nas reunións que se teñen producido o papel dos representantes da empresa limítase a facer como que escoitan as nosas exixencias e a dicir que teñen que remitir todo a León. O único que fan é dificultar o traballo sindical do Comité e impedir que se chegue a acordos que melloren as condicións dos xestores de emerxencias. O último episodio produciuse nestes días, con Pedro Osorio dicindo que non é legal chegar a unha consolidación salarial co Comité durante o período eleitoral. Isto é rotundamente falso: o Comité ten todas as súas atribucións mentres non sexa substituído por unha nova representación. Enfín: outra tentativa de atrasar todo.

A pesar de todos os impedimentos, o Comité segue a traballar arreo, e como exemplo a asemblea que tivemos hoxe, na que se comentaron as denuncias que se están a preparar e se organizaron novas mobilizacións para os próximos días.

Laudo dá a razón á Mesa e aos traballadores

2011-02-16T21:12:00.002+01:00

Velaquí o "compañero" Viejo Fresno

Finalmente fíxose público o laudo que lle da a razón á Mesa Eleitoral do 112 na exclusión das dez persoas que a empresa tentou meter pola brava no censo eleitoral. O ridículo feito por Telemark na arbitraxe e a non comparecencia de UGT tras ter apresentado unha segunda impugnación xa nos facía pensar que, por lóxica, a árbitro daría a razón á Mesa, como efectivamente aconteceu. O censo eleitoral volve ter 83 persoas: as persoas que si traballamos no 112.

Así as cousas, parece que a relación de Telemark e UGT non ten xa sentido no 112, especialmente despois de anunciarmos que demandaremos a Ana Blanco Antón, o mando intermedio da empresa e membro de Fes-UGT que chamou a diversos traballadores do 112 para coaccionalos. En calquera caso, temos xa algúns datos interesantes sobre señora en cuestión: sabemos que foi presidenta do Comité de Empresa de Telemark en León, que se movía en coche de empresa e que os seus excesos e o seu compadreo coa empresa provocaron, como mínimo, un intento de reprobala e que a USO arrasase nas últimas eleicións celebradas alí. Na actualidade, Ana Blanco é secretaria sectorial de seguros e oficinas de FeS-UGT. Tamén temos datos do "compañero" Miguel Ángel Viejo Fresno: no arbitrio, Pedro Osorio (que, por certo, se presentou como traballador afectado pola exclusión do censo) dixo que vive na Coruña e se encarga de negociar coa administración e cos proveedores galegos para o centro de Telemark en Santiago. Porén, no seu perfil de redes sociais, o tal Viejo Fresno di residir en León e traballar para Telemark en León. E, por certo, este señor estaba presente na reunión que mativemos xusto antes de que comezase a contrata con persoal de alta dirección de Telemark - incluído José Ángel Crego, presidente da empresa, e Susana Gª Panchón, responsábel de RRHH. Enfín, todo un "compañero". No laudo tamén foron revelados datos dos resto de persoas que a empresa pretendía colar no censo: Igor Coque del Río é o encargado da plataforma informática e corresponde a outra contrata, ao igual que José María Casas Leira e Raquel Costa Pombo; Cristina Fernández Ámez é a técnico de contabilidade que confecciona (mal) as nosas nóminas; Beatriz Moyano Álvarez é a xefa de formación de Telemark; e Pablo Pérez Rubio é o responsábel do departamento de Tecnoloxía para todo Telemark. Velaí as persoas que non coñecíamos de nada e que a Mesa decidiu eliminar do censo con bon criterio, como fica xa acreditado pola xefa da Inspección de Traballo. Agora, finalizado o segundo prazo de presentación de reclamacións sen que a empresa nen UGT fixesen novos movementos, parece que as eleicións se vaian desenvolver por fin coa necesaria normalidade. Serán capaces de mantela até o 7 de marzo para podermos votar e terminar con isto dunha vez por todas?

O que está claro é que, aínda cando o laudo nos dá a razón aos traballadores, si conseguiron o seu obxectivo de ternos o maior tempo posíbel ocupados no proceso. Un proceso que nós non teríamos ningún interese en convocar de non ser polas sospeitas de que Telemark tentaría influir nel. E, coa perspectiva do tempo, só podemos comprobar que estábamos no certo. Quen sabe o grao de penetración e influencia que a empresa tería atinxido se tivésemos tardado un par de meses mais en convocar o proceso!

Documentación (clica para veres):

Laudo arbitral dando a razón á Mesa eleitoral do 112 na exclusión das 10 persoas de estrutura e mando de Telemark.

Votacións no 112: adiadas

2011-02-12T00:47:00.000+01:00

Forges

En cumprimento do laudo arbitral que dá a razón a UGT na súa impugnación ao calendario eleitoral, a Mesa elaborou onte un novo calendario que fixa a data das votacións para o día 7 de marzo. A empresa e os seus "sorprendentes" aliados conseguen así atrapallar un proceso que debería ser claro, rápido e terminar o luns 14 co nomeamento dun novo Comité de Empresa que proseguise a liña de loita do actual. Sen embargo, non será así.

O seu obxectivo é claro: que o persoal que verdadeiramente traballamos no 112 e atendemos as emerxencias do país nos dediquemos a dar voltas arredor destas eleicións e que deixemos de reclamar o que é noso. Que ninguén se leve a engano: a nós tanto nos ten o proceso. O que queremos é dignidade salarial, estabilidade laboral, e un comité que nos represente e nos defenda diante dos atropelos diarios de Telemark. Non queremos mandos da empresa no noso comité. Non queremos máis argucias nen máis trapalladas. O día 7 de marzo vamos votar e terminar con isto para dedicarmonos ao que de verdade nos interesa.

Telemark fai o ridículo na Inspección de Traballo e UGT coacciona.

2011-02-08T21:12:00.000+01:00

O Comité de Empresa do 112 levaba xa máis dun ano caducado (aínda que con todas as súas competencias) cando, no mes de decembro, optamos por convocar unha eleccións sindicais para renovalo. Realmente non foi porque fora o mellor momento, xa que nos atopamos en pleno conflicto coa empresa e a administración a respeito das nosas condicións laborais que non deixan de empeorar desde a chegada de Telemark. Sen embargo, dados os modos autoritarios desta empresa, optamos por facelo canto antes porque sospeitábamos que canto mais tempo se tardara máis tentación de intervir no proceso ían ter.

Efectivamente, cando no mes de decembro se convocaron as eleccións sindicais, quedou claro que Telemark non ía deixar pasar a oportunidade de condicionar o proceso eleitoral. Mais alá de tentar tutelar todo desde o primeiro día, o grave veu cando a mesa eleitoral lle solicitou o censo de traballadores. Nese censo incluíron a 10 persoas entre as que hai directivos da empresa, mandos intermedios que traballan en León -e que ninguén coñece- ou persoal que traballa para o 112 pero desde outra contrata. Nun censo de 83 traballadores a inclusión de 10 máis permitiría automaticamente presentar unha candidatura e elexir un delegado de persoal unicamente cos seus votos e sen contar coas persoas que verdadeiramente somos traballadores e traballadoras do CAE 112 Galiza. Con toda a cara do mundo entre esas persoas estaban os nosos "compañeiros de traballo" Sebastian Arancio, Susana García Panchón e Pedro Osorio que, ao estaren incluídos no censo poderían votar e mesmo presentarse como representantes dos traballadores. Evidentemente, a mesa eleitoral decidiu a exclusión de todas estas persoas tras ter solicitado á empresa que acreditase a súa pertenza ao centro de traballo - o que a empresa non fixo.

A vontade das empresas de incidiren nas eleccións sindicais tampouco é un invento de Telemark. A sorpresa saltou cando a UGT presenta unha impugnación por entender que estes "compañeiros" estaban vendo minguados os seus dereitos no proceso. Porén, o único que fixeron con esta actitude foi favorecer os intereses da empresa no seu intento de manipular o proceso.

O día 8 de febreiro, na Inspección de Traballo da Coruña, celebrouse o laudo arbitral correspondente á impugnación realizada por UGT, e a situación foi xa esperpéntica. A propia UGT, por cuxa causa estábamos alí, nen sequera se persoou e foi a empresa directamente quen defendeu a “lexitimidade” destas persoas para participar nas eleccións. Aparte de facer o ridículo e mentir descaradamente, como única “proba” entregaron unhas comunicacións que rexistraran na Oficina de Empleo de Castilla y León segundo as cais estas persoas pasaban a estar adscritos ao centro de Santiago, malia nunca teren traballado nel. O escandaloso é que as eleccións se convocaron o día 21 de decembro e os escritos están todos rexistrados o día 20 de Xaneiro co que, ademais de non poder legalmente participar no proceso, se evidencia unha clara intención de inflar o censo con persoal afín co obxectivo que nós vimos denunciando: manipular as eleccións e restar forza á representación verdadeiramente lexítima do persoal do 112.

Sen embargo o papel da UGT non quedou só en ser o tonto útil da empresa frente á mesa eleitoral e á Inspección de Traballo. En primeiro lugar, convocou no seu día asembleas de traballadores para tentar elaborar a súa candidatura, o que non tería nada de malo de non ser poque esas mesmas asembleas foron promovidas por mandos da empresa que solicitaron persoalmente a determinados traballadores que se reunisen coa UGT (e só coa UGT, por certo, non con CC.OO. ou con USO, que tamén se apresentaron ao proceso). Posteriormente, e dado que a resposta do persoal do 112 foi claramente negativa, optaron por seguir polo camiño das presións. Nos últimos días, numerosos traballadores do 112 están a receber no seu teléfono particular chamadas dunha tal Ana Blanco que se presenta como “una compañera tuya de León” e que xa pasou de "te queremos explicar nuestro proyecto" a pretender que se lle asine unha candidatura pola UGT. Aínda con todo, isto non tería nada de estraño se non fora porque esta persoa ten acceso aos teléfonos particulares dos traballadores - loxicamente facilitados por Telemark - e porque o tono das chamadas chega, en ocasións claramente, á coacción.

Desde a CIG exiximos que cesen as presións e que os traballadores e traballadoras do 112 podan escoller libremente se queren ou non formar parte dunha candidatura e cal vai ser a súa participación no proceso eleitoral. De continuar as presións anunciamos que se presentarán denuncias contra Ana Blanco, UGT e Telemark por acoso e por incumprimento da Lei de Protección de Datos.

O proxecto de Telemark

2011-02-04T12:51:00.000+01:00

Velaquí a última de Telemark: chamar aos traballadores ao seu teléfono persoal para citalos individualmente e presentarlles o programa electoral da empresa. Así de simple: soa o teléfono e unha persoa descoñecida que se presenta como Ana Blanco, di que é "compañera tuya" de Telemark e que quere falar contigo para presentarche "nuestro proyecto" en relación ás eleccións sindicais.

Cal é o proxecto de UGT-Telemark xa o sabemos: defender que o persoal de dirección e estrutura da empresa poida votar e tentar atrasar o proceso para que tamén poidan votar persoas doutras contratas. O obxectivo é decantar os resultados eleitorais - por suposto, non ao noso favor. O que aínda non sabemos é quen é Ana Blanco e quen lle facilitou os nosos teléfonos persoais. Ou si?

Radios locais: 112 presente!

2011-02-01T22:43:00.002+01:00

Esta mañá, o servizo de Radiofusión, que elabora novas e contidos para numerosas cadeas de radio locais galegas, entrevistou a compañeira Isa Moares sobre as condicións laborais no 112, sobre o conflito derivado do seu empioramento e sobre as consecuencias que este conflito podería ter na prestación do servizo público de atención de emerxencias.

Isa Moares salientou que a teima de Telemark en tratar as emerxencias como se fosen unha cadea de montaxe podería preduxicar a prestación do servizo de non ser pola profesionalidade do persoal do 112 e malia a neglixencia da Xunta de Galiza e da AXEGA - empeñadas en miraren para outro lado e faceren como se non fose con elas.

Escoita a entrevista íntegra aqui.
Chuza a nova aqui.

UGT impugna o proceso eleitoral

2011-01-29T15:15:00.000+01:00

Hai só uns días dicíamos aquí que Telemark tiña tomado a decisión de participar nas eleicións sindicais que están marcadas para o día 14 de febreiro, e tamén que, ao incluír no censo 10 persoas da estrutura da empresa e mesmo da súa dirección, o seu obxectivo era, de entrada, dobre: por unha banda, apresentar unha lista propia da empresa e, por outra, incidir claramente no resultado eleitoral através do voto desas 10 persoas a mais que introduciran previamente no censo.

O escandaloso da situación non é só iso, senón o papel que a UGT está a xogar neste proceso – non porque queira apresentar unha lista alternativa á da maioría do persoal do 112, xa que está no seu pleno dereito, senón por se converter claramente nunha ferramenta de Telemark e por se prestar a defender os intereses da empresa tentando dificultar o proceso desde o inicio. O seu obxectivo é enzoufar o que debería ser un procedimento ben claro e áxil, e atrasar todo o posíbel a data das votacións para que Telemark teña tempo de influír no sentido de voto dos compañeiros que teñen unha situación laboral máis precaria e poida, ao mesmo tempo, ternos paralisados neste proceso en lugar de permitir que nos ocupemos de exixir unha solución ao conflito que temos acima da mesa. E para lograr iso, primeiro puxo en cuestión a maneira de proceder e a honorabilidade das persoas que fan parte da Mesa eleitoral, acusándoas de estaren influenciadas pola CIG á hora de elaboraren o calendario; e agora impugna a decisión da mesma Mesa de excluír do censo de eleitores todo aquel persoal que non cumpre os requisitos legais para emitir o seu voto ou que negocia “con amplos poderes” as condicións dos traballadores e das traballadoras do 112.

Isto significa que na próxima semana, tanto a Mesa como todos os sindicatos terán que acudir á Coruña para que un árbitro imparcial diga se o proceso debe continuar con plena normalidade –que é o que nós desexamos– ou se hai que atrasar algunha data, que é o que tanto UGT como Telemark pretenden. Desde a sección sindical da CIG no 112 só agardamos unha resposta que dea a razón á Mesa eleitoral, que deixe claro a Telemark que non pode influír no resultado das votacións através de subterfuxios e manobras estrañas en colaboración coa UGT, e que asegure que unicamente podan votar para escoller os seus representantes sindicais aquelas persoas que verdadeiramente traballan no 112.

27 de Xaneiro: 112 presente!

2011-01-28T18:24:00.000+01:00

O 112 estivo presente na exitosa manifestación da Folga Xeral convocada pola CIG no día de onte polas rúas de Compostela. A nosa faixa en apoio á folga e exixindo solucións ao conflito laboral que se mantén desde hai anos foi unha das mais comentadas polos mais de 5000 asistentes que ateigaron primeiro a Praza Roxa e despois a Praza das Pratarías. Unha vez máis: 112 presente!

A manifestación á entrada da Praza de Galiza

A manifestación na rúa da Senra

Faixa do 112 nas escaleiras das Pratarías, diante dos 5.000 asistentes

112 apoia a Folga Xeral do 27-X.

2011-01-26T12:51:00.002+01:00

O Comité de Empresa do CAE 112 Galiza, con representantes da CIG e de CC.OO., apoia unanimemente a folga xeral convocada pola CIG para mañá, 27 de xaneiro, en defensa do sistema público de pensións e do emprego con dereitos. As reformas que pretende impulsar o governo español afondan na inxustiza social ao reducir as pensións da maioría máis pobre e incrementar as da minoría máis rica. Nós, como traballadores dun servizo público privatizado e sometido ao convenio de Telemarketing, o mais precario de cantos hai no conxunto do Estado, temos claro que a reforma destas pensións nos vai prexudicar directamente, xa que a maioría do persoal do 112 si será afectada no momento en que se vaia xubilar.

Primeiro foi a reforma do mercado de traballo, que consistiu fundamentalmente en abaratar o despedimento. A semana pasada, o ministro do Traballo recoñeceu que a medida non está a mellorar a contratación, senón a empiorala. Pero nada se di de rectificar. Non funciona para crear emprego, pero sí para despedir máis barato, que é o que quere a CEOE.

Agora está na mesa a reforma das pensións, que pretende dificultar o acceso ao sistema público de pensións para que os traballadores comecemos a contratar plans privados de xubilación – plans privados que dependen da grande banca que hai só uns meses o governo español resgatou con miles de millóns de euros, producindo así o burato da débeda que agora todos pagamos. Enfín, todo para a banca, nada para nós.

E detrás disto ven a reforma da negociación colectiva, coa idea de eliminar os convenios provinciais e centralizar a negociación en Madrid, onde os sindicatos máis combativos, como a CIG ou ELA, teñen menos representatividade. E, ademais, pretenden eliminar a ultraactividade do convenio, de maneira que se non se negocia un convenio novo antes da finalización do anterior, as empresas poden pór os seus traballadores a condicións mínimas, sen ter que respeitar o convenio que fose asinado anteriormente. De modo que as melloras que conseguimos por riba do convenio no 112 poderían ficar sen efecto no caso de que os sindicatos estatais non conseguisen – ou non quixesen – forzar a patronal a negociar un novo convenio. Só como apuntamento: o convenio de Telemarketing caducou en 2009. Neste escenario, se a reforma da negociación colectiva se tivese aprovado anteriormente, Telemark podería pornos a condicións mínimas (estatuto dos traballadores, salario mínimo interprofesional, máis horas de traballo, etc.). Alguén dubida que Telemark non aproveitaría esa situación? Pois, como Telemark, o resto das empresas.

Contra todo este panorama, o persoal do 112 estará presente na manifestación de Compostela ás 12h30 na Praza Roxa cunha faixa que demostre a súa adesión á folga e que exixa a solución do conflito laboral que, desde a chegada de Telemark, non fixo mais que agravarse.

Contra as reformas antisociais e polo emprego digno,

na Folga Xeral, 112 presente!

Que quer Telemark do proceso eleitoral no 112?

2011-01-23T16:53:00.000+01:00

Desde antonte, o proceso de eleicións ao Comité de Empresa do CAE 112 está xa en marcha coa constitución da mesa eleitoral. E desde antonte xa, todo o persoal que traballamos no 112 estamos informados da existencia de "compañeiros" que non coñecíamos: persoal de estrutura de Telemark-Spain que, para a nosa sorpresa, están incluídos no censo de eleitores e que, por iso mesmo, poderían tamén resultar eleitos para o Comité de Empresa, xa que contan cunha antiguidade superior á que marca o inicio dos seus traballos para este centro. Por ese camiño até se podería chegar á situación demencial de que Sebastián Arancio, que dirixe o 112 para Telemark e en grande medida é o responsábel das últimas manobras da empresa, fose nomeado membro do Comité que ten que defender os intereses dos traballadores.

A escusa da empresa é que, na medida en que todo o persoal de estrutura é persoal de Telemark e na medida en que están adscritos a este centro (aínda que algúns deles non estiveron nunca presentes nel), esas persoas teñen dereito a voto no 112. Alén das dúbidas legais que isto concita, o que parece claro é que a empresa ten intención de influir nas eleicións, mesmo que só sexa mediante o voto desas persoas. Só iso xa dá para propor unha seria dúbida ética. Mais, en todo caso, pensarmos que, tendo a oportunidade, a empresa non o vai facer sería perigosamente inxenuo pola nosa parte. Que sentido ten que a empresa e os seus representantes voten por unha candidatura ou contra unha candidatura coa que despois teñen que negociar temas fundamentais? Ou, pior aínda, que sentido tería que persoal executivo da empresa estivese presente en candidaturas ou, sen estalo, as apoiase tacitamente? A inxerencia das empresas nos procesos eleitorais nas empresas non é unha novidade. Non a inventou Telemark. Mais para nós non hai dúbida de que tentará crear división entre os traballadores e usar o poder de voto que se autoconcederon para privilexiar calquera candidatura con tal de que non se repitan os resultados das últimas eleicións.

Telemark quéixase de que nos queixemos

2011-01-20T01:35:00.000+01:00

Hai un proverbio chinés que di que todas as flores do futuro están nas sementes de hoxe. Das que se sementaron onte temos as flores actuais, e agora resulta que Telemark se queixa da dureza do comité de empresa, cando foron eles quen, hai só uns dias, nos negaron unha reunión coas palabras "teremos a reunión cando nós queiramos". Entón, que pretenden? Tratarnos como se fósemos estúpidos e pretender que continuemos a lles rir as grazas, a ser simpáticos, a negociar miudices e cousas polo estilo en vez de nos centrar no que de verdade nos importa? Pois parece que si.

Sorpréndense de que a nosa posición sexa de forza, tentando facernos crer que xa se conseguiron unha morea de acordos e que a disposición de Telemark é boa. Pero non son capaces de citar un só deses acordos. Porque parece que están dispostos a negociar connosco a aplicación de certas condicións que xa son de lei ao estaren aprovadas previamente na negociación colectiva coa anterior empresa, e dicir, despois, que iso é avazar. Pero, desde logo, non están tan dispostos a tratar os puntos quentes das nosas reivindicacións: salario digno, e non esta trampa de absorvíbeis e contas convenio e trangalladas polo estilo; unha subrogación no prego de condicións e non esta fórmula que é pan para hoxe e fame para mañá; e unha regulación das gardas de 24 horas, e non esa estratexia de sacalas do cadrante e deixarnos ás espensas de que, de un día para outro - porque daquela si lles dea a gana - nos sorprendan de novo recuperándoas.

Enfin, en Telemark serán moi modernos e moi internacionais, pero a súa xestión do 112 non fai mais que producir tensión co persoal de emerxencias e empeorar a calidade do servizo público e, desde logo, a súa xestión do conflito é unha pura chapuza de manual.

Empresa négase a recibir o Comité de Empresa

2011-01-14T19:48:00.000+01:00

"Non hai nada que falar". "Non estamos interesados". Con esas palabras, Sebastián Arancio e Pedro Osorio demostran mais unha vez a súa actitude completamente hostil de cara aos representantes dos traballadores e traballadoras do 112 e mais a nula capacidade da empresa Telemark para xestionar o conflito laboral que existe no 112. É precisamente esa actitude destrutiva que o persoal do 112 xa denunciamos da AXEGA o que agora nos topamos por parte da empresa e o que non nos deixa outra saída que tentarmos outras vías, menos gratas pero, polo visto até hoxe, máis efectivas.

Desde logo, non nos poderán acusar de non termos tentado solucionar esta situación polas boas, solicitando reunións coas demais partes para trasladar a nosa boa disposición a negociar calquera cousa, partindo sempre dunha base mínima, que son os dereitos que son nosos por termolos acordado antes. Nós só queremos que a empresa deixe de modificar arbitrariamente as nosas condicións de traballo.

Só queremos realizar o noso traballo, que é prestar o servizo público de atención de emerxencias, sen ter que estar constantemente a nos preocupar de cobrarmos o salario correctamente, de non sufrirmos represalias por negármonos a cubrir quendas no noso tempo de descanso ou de que nos ameacen con calquera escusa para nos meteren o medo no corpo e que renunciemos ao que temos acordado e ao que é lexítimo aspirarmos. O 112 pode - e debe - ser un traballo digno para que o propio servizo que prestamos sexa tamén digno. Mais parece que hai persoas especialmente interesadas en manter a precariedade no servizo público de emerxencias. Por que?

Non ao agasallo envenenado de Telemark!

2010-12-27T03:19:00.000+01:00

Tanto ten que teñamos unhas regulacións de xornada, que teñamos secuencias que permitan a conciliación da vida privada e da vida laboral e que manteñan o persoal de xestión de emerxencias suficientemente descansado e preparado para situacións de forte tensión. Agora Telemark modifica esas condicións, pon máis horas de traballo para cada un de nós e faino ademais de maneira irregular, cargando a uns máis que a outros e sen que iso signifique unha maior remuneración económica. Por outras palabras: queren que en 2011 traballemos mais e cobremos o mesmo, o que significa, na práctica, que cobremos menos. Seguiremos cobrando esa cantidade non consolidada que nos fai perder capacidade adquisitiva e seguridade salarial, e que continúa a ser menor da marcada polo prego de condicións da subcontrata da Xunta. Máis unha proba do telemarketing puro e dunha xestión que permite ás empresas enriquecerse através da explotación de quen traballa. Velaquí o agasallo de Nadal de Telemark-Spain para o persoal do 112. Nós dicimos non.

Non a máis traballo e menos salario.

Non a máis precariedade e menos servizo público.

112 no Parlamento (outra vez)

2010-12-15T12:40:00.000+01:00

O Comité de Empresa mantivo antonte, día 13, unha reunión con Alfredo Suárez Canal (deputado do BNG no Parlamento de Galiza) para solicitarlle que realice unha pregunta parlamentar e que o goberno galego teña que responder sobre a situación de conflito no 112, xa que a teima da empresa en non respeitar os acordos e en negar o salario acordado, coa connivencia do Director Xeral de Emerxencias e da Consellaría da Presidencia, está a afectar á calidade do servizo público de atención de emerxencias. Talvez así Santiago Villanueva e Alfonso Rueda deixen de mirar para outro lado e de dicir que o problema é entre traballadores e empresa. Porque o problema non é ese. O problema é que a Xunta outorgou o servizo a unha empresa que non fai máis que causar precariedade para os traballadores e deficiencias no servizo á cidadanía.

Obradoiro vs. León. 112 presente!

2010-12-12T00:06:00.000+01:00

A empresa Telemark, que xestiona o 112 desde que a Xunta de Galiza a colocou á frente do servizo de atención de emerxencias, é unha das patrocinadoras do Club Baloncesto León. No partido que o enfrentou esta tarde ao CAB Obradoiro no Multiusos Fontes do Sar, estivemos presentes despregando unha faixa diante dos mais de 3.000 asistentes, entre os que había varios cargos da Xunta, incluído o Director Xeral de Emerxencias e Interior, Santiago Villanueva, con quen vimos de reunirnos e que continúa negándose a pór solución a un conflito ben sinxelo de resolver. Tamén repartimos 600 notas informativas entre os seareiros, que se amosaron sorprendidos de que a Xunta estexa disposta a precarizar até tal ponto un servizo público tan sensíbel como é o 112. Unha vez mais, o 112 estivo presente e Telemark e a Xunta quedaron en evidencia perante a cidadanía, que quer xestión responsábel e de calidade.

As faixas volven ás pontes

2010-11-27T12:20:00.000+01:00

As faixas volven ás pontes, á rúa, para comezar a denunciar publicamente o escándalo da xestión do Centro de Emerxencias de Galiza. A Xunta non nos quería escoitar e a empresa adiaba constantemente calquera reunión connosco, malia a gravidade de unha situación que xa ten sobre a mesa ameazas de degradacións e despedimentos. Agora teránnos que escoitar. Porque diante desas ameazas nós reclamamos o fin inmediato desta actitude hostil da empresa Telemark-Spain, que teima en xestionar o 112 como se fose un centro de venda telefónica, e que a Xunta de Galiza se comprometa a avanzar nas nosas reivindicacións en lugar de facer como se non fose con ela. Telemark culpábel. Xunta responsábel.

Calidade do servizo e ameazas ao persoal

2010-11-22T19:22:00.000+01:00

Despois de varias semanas recibindo constantemente ameazas de nos pór na rúa, a empresa Telemark acaba de comezar a notificarnos as súas valoracións de calidade do servizo. Disque non traballamos ben. Pero o caso é que en ningún momento se nos comunicaron cais son os parámetros de calidade aos que temos que chegar. É dicir: que nos exixen que cumpramos uns parámetros que non coñecemos. E, se non os cumprimos, ameazan con despedimentos, con degradacións de categoria e así por diante.

Esta situación é completamente nova para nós. MkPlan 21, a anterior concesionaria do servizo, xamais dubidou da nosa profesionalidade e até nos momentos máis crus do conflito que mantivemos con eles a nosa boa disposición e o noso bon facer nunca foi posto en entredito. O único que podemos deducir, daquela, é que o problema é da empresa, e non noso. Sobre todo porque os resultados da enquisa á poboación realizada o ano pasado avalan claramente o noso modo de traballar: 99% da poboación considera que a súa chamada foi atendida rapidamente; 97% indica que, no caso de consultas, recibiu a información que solicitaba; 84% sostén que a súa solicitude de auxilio foi correctamente recibida; 99% recomendaría o servizo telefónico do 112 aos seus achegados; e 99% considera que o persoal do 112 é "cordial" ou "moi cordial, transmitindo seguridade".

Porén, a empresa acúsanos - sen probas - de atender de malos modos aos chamantes, de enredar nas chamadas e outras valoracións polo estilo. Non deixa de sorpreendernos que, xustamente, esas valoracións as faga unha persoa que hai só dous meses descoñecía todo sobre o 112 e que se dedicaba a dar servizo de atención telefónica a compañías de internet, de telefonía, etc. Si, xustamente a ese sector que sempre resulta tan ben valorado polos usuarios... Enfín, cousas da privatización. Cousas de regalarlles as concesións aos amigos.

A interminábel historia do centro de traballo

2010-10-25T12:11:00.000+02:00

Temos que nos informar por un panfleto local do Partido Popular da Estrada que as obras da nova sé do CAE 112 Galiza estarán rematadas nun prazo de 18 meses desde a súa licitación. É dicir, que é só através dun texto de propaganda política que temos coñecemento do noso futuro traslado a unhas novas instalacións que, a dicir de Juan José Muñoz, xerente da AXEGA, son un importante gasto para mellorar as nosas condicións laborais. Xa temos criticado en numerosas ocasións este modo disparatado de considerar o conflito do 112 – e cómo, através dese modo de entendelo (non entendendo nada) a Xunta non é capaz de solucionar un conflito que nada ten a ver coas instalacións.

É certo que temos denunciado varias veces que o material de traballo do 112 non é o adecuado, que está obsoleto e que cómpre renovalo e mantelo actualizado. Pero nesas denuncias non nos referimos en momento ningún ao propio centro de traballo, senón á información de manexamos e que serve para xestionar as emerxencias de modo mais eficiente. Por certo que é precisamente o persoal do 112 – ao que agora a AXEGA acusa de falta de seriedade e de pouca profesionalidade – o que estivo a realizar este traballo de actualización que non se lle remunera e que non lle corresponde. Así as cousas e tendo presente tamén a actitude hostil da empresa Telemark e da Xunta de Galiza cara aos traballadores, que o centro de traballo sexa máis ou menos cómodo non é un tema que urxa nen que represente sequera unha preocupación para nós. As nosas prioridades están ben claras: consolidación salarial e pago das contías acordadas, regulación e retribución das gardas de 24 horas, e subrogación plena e non revisábel. O que veña a mais estará ben, pero non vai solucionar o conflito. Sáibano.

Informando a cidadanía

2010-10-15T13:37:00.000+02:00

Esta mañá celebrouse no local nacional da CIG unha rolda de prensa convocada polo Comité de Empresa do CAE 112 Galiza para explicar as condicións laborais e as deficiencias de cobertura no servizo de atención de emerxencias da Xunta. Os medios de comunicación presentes, así como aqueles que conversaron posteriormente co Comité de Empresa do 112, interesáronse polo reinicio do conflito laboral que mantemos, sobre todo cando responsabilizamos directamente a Xunta de Galiza e a Axencia Galega de Emerxencias das problemáticas que reaparecen malia estaren en grande parte solucionadas na anterior contrata.

Como xa dixemos, a empresa non cumpre os mínimos de traballadores para cubrir o servizo, e a Xunta sábeo. Tampouco cumpre os acordos laborais, e a Xunta tamén o sabe, dándolle a razón á empresa. Por iso, e porque a Xunta parece non querer ocuparse deste conflito nun dos seus servizos públicos, seremos os traballadores do 112 quen, mediante demandas por vía xudicial e denuncias a pé de rúa, teñamos que forzar a solución: que paguen o acordado, que manteñan a totalidade do plantel e que rematen os abusos das gardas de 24 horas. En definitiva, que se poñan en marcha os acordos a que temos chegado coa AXEGA e coa Xunta. Así o transmitimos aos diversos medios de comunicación, para que a cidadanía estexa informada da xestión neglixente de Juan José Muñoz (xerente da AXEGA), Santiago Villanueva (director xeral de Emerxencias e Interior) e Alfonso Rueda (conselleiro da Presidencia).

Regreso ao futuro. Vellas deficiencias que se repeten.

2010-10-14T19:48:00.000+02:00

Parece que Telemark comeza a súa xestión do 112 Galiza reproducindo algunha das teimas que no seu día denunciamos de MkPlan 21: no último mes xa van varios turnos en que o dimensionamento mínimo do servizo que estipula a AXEGA non se cumpre. E aínda que a propia AXEGA e a Xunta son claramente conscientes, ningunha se importa o máis mínimo. Resultado: deficiencias de cobertura que van camiño de tornarse novamente habituais se non se lles pon remedio.

Na anterior ocasión, tivo que ser o persoal do 112 quen demandase precisamente un dimensionamento correcto e quen denunciase que MkPlan 21 non estaba a manter os mínimos estabelecidos pola Administración. Entón, foron as traballadoras e os traballadores os que demostraron o maior interese no bon funcionamento do teléfono de emerxencias ao mesmo tempo que reclamaban unhas melloras mínimas nas súas condicións laborais.

E hoxe, polo que parece, a historia volve repetirse ponto por ponto. Quen denuncia a situación volve ser o persoal do 112. Quen mira para o outro lado seguen a ser a AXEGA e a Xunta de Galiza, desde o Director Xeral de Emerxencias e Interior, Santiago Villanueva, ao Conselleiro da Presidencia, Alfonso Rueda. E quen se beneficia continúa a ser unha empresa privada, como en todas as subcontratas e chiringuitos da Xunta. Até se reproduce unha outra cuestión: igual que no seu día MkPlan21 sostiña o discurso de que sobraban traballadores no 112, hoxe é Telemark quen, desde o primeiro día da súa xestión, mantén ese discurso que ameaza ao mesmo tempo postos de traballo e a calidade do servizo. Para a nova empresa, tamén sobran coordinadores e xestores de emerxencias, ainda que despois non se cubran os mínimos estabelecidos na contrata.

Nós xa dixemos claramente que a calidade do servizo de emerxencias 112 está directamente relacionada coa calidade laboral do persoal do 112. Agora paira novamente no ambiente esa teima en reducir postos de traballo. E tamén paira o que esconde por trás de si: unha redución de custos que faga aumentar a columna dos beneficios da empresa privada á conta do diñeiro e dos servizos públicos - e á saúde desa reforma laboral regresiva e antisocial que agora torna mais barato despedirnos. Abonda xa: queremos servizos públicos e querémolos correctamente dotados. Se non, non nos serven, nen como cidadáns nen como traballadores.

Traballamos de balde?

2010-10-11T11:55:00.000+02:00

Xa sabíamos que Telemark non estaba disposta a pagar a cantidade que temos acordado no seu momento con MkPlan21 e coa Axencia Galega de Emerxencias. A súa actitude na primeira e última reunión a tres bandas, na que permaneceu calada mentres os noso Comité de Empresa era insultado e acusado de mentir, demostróunolo claramente.

O que non esperábamos era que, ademais, fose incapaz de facer unhas nóminas correctas: todas diferentes, todas mal. Na maior parte dos casos, o salario base non se corresponde co acordado; noutros casos desapareceron os pluses salariais que se corresponden co noso traballo nocturno e de domingo; e até nalgún caso falta máis de medio salario, ao que hai que unir a teima da propia empresa en que negociemos nós coa anterior concesionaria a liquidación das vacacións porque ambas as empresas se negan a arranxar entre si as nosas liquidacións. Entón, volvemos ao de sempre? Imos traballamos de balde?

112 reinicia o conflito con denuncias xudiciais e mobilización na rúa

2010-10-08T17:27:00.000+02:00

Telemark-Spain S.L., a nova empresa que xestiona o Centro de Emerxencias 112 Galiza, xa comezou a modificar as condicións laborais do persoal do 112 co obxectivo de aumentar o seu lucro reducindo custos a calquera prezo, o que precarizará aínda mais o plantel e afectará directamente á calidade do servizo público de emerxencias.

En setembro deste ano, a Xunta de Galiza, através da AXEGA, outorgou a concesión por 2 anos e 5 millóns de euros a unha empresa, Telemark Spain, S.L., que se dedica a xestionar servizos de Telemarketing a terceiros desde Sudamérica, que ten unha rama inmobiliaria e outra tecnolóxica e que xamais antes xestionou un centro de emerxencias. A falta de experiencia da nova empresa é tan manifesta que xa comezou a facer cambios que atentan claramente contra a calidade do servizo público que prestamos, co obxectivo de aumentar o lucro mediante a modificación das nosas condicións laborais e salariais. O seu obxectivo é tratar o 112 como se fose un servizo de telemarketing puro – un dos sectores máis precarizados de cantos hai – omitindo á mantenta as condicións específicas da xestión de emerxencias, os niveis de stress, o desgaste físico e psicolóxico adicional e a necesidade de formación específica e de experiencia concreta no trato das emerxencias. Nas reunións que xa tivemos a respeito disto, a propia empresa insiste en cuestións de produtividade, como se no 112 en lugar de xestionar o socorro en casos de emerxencia do que se tratase fose de fabricar produtos ou vendelos. Aínda mais, por primeira vez desde que este servizo existe comezan a pedirnos que reduzamos ao mínimo o tempo de trato coas persoas que alertan dunha emerxencia e que unifiquemos as nosas preguntas e as nosas respostas ao punto de comportármonos como máquinas, ignorando novamente que unha situación de emerxencias non responde a un protocolo inflexíbel, senón a unha cantidade de condicionantes tais que se fai necesario atender as emerxencias unha por unha – porque non se pode dar o mesmo trato a unha petición forzas da orde que a un suicida. A consecuencia directa destas exixencias da nova empresa poderá comprobarse inmediatamente: perda de flexibilidade no trato, perda de profesionalidade na xestión e, en xeral, perda de calidade na prestación deste servizo público. Perante isto, a Xunta e a AXEGA, coa súa actitude incendiaria e hostil aos traballadores posiciónanse favorabelmente ao recorte de dereitos e prestacións laborais do persoal do 112, inclusive daquelas que xa tiñan sido acordadas coa anterior empresa, MkPlan21, S.A., e que veñen recoñecidas polo documento de subrogación asinado polo noso Comité de Empresa e pola nova concesionaria. A AXEGA é responsábel por esta situación, pero négase a recibir ao noso Comité de Empresa e, cando por fin accede, crese con dereito a decidir que membros e en que calidade deben acudir á xuntanza – todo para despois acusarnos de pouca seriedade e de non entendermos as condicións de crise que estamos a atravesar.

Diante disto, a nosa interpretación é moi clara. Primeiro: a crise non ven derivada dos nosos salarios nin das nosas condicións laborais. A crise non a provocaron os traballadores e traballadoras, e nós non estamos dispostos a asumir nen a responsabilidade nen nengún recorte que se queira xustificar por esa vía. Segundo: as cantidades económicas que están asinadas e que agora nos pretenden recortar corresponden a 2007, cando non había crise, e non as modificamos desde entón – demostrando así un rigor e unha seriedade fora de toda dúbida. Ademais, reclamamos unha regulación do noso traballo de gardas de 24 horas, xa que non estamos a percibir un só céntimo por ese traballo que se realiza como horas extras e que a miúdo non responde a necesidades reais, senón á negativa da empresa a manter un servizo correctamente dimensionado. E, dado que nen a empresa nen a Xunta de Galiza queren cumprir o acordado, non nos queda outra opción que abrir vías xudiciais e de mobilización social co obxectivo de acadar un fin satisfactorio ao conflito. A nosa única exixencia é que se respeiten os acordos asinados. Mentres os responsábeis do servizo se neguen, nós non pararemos nen descartarmos calquera medida de presión.

A CIG convoca manifestacións en todas as comarcas este Primeiro de Maio

2010-04-29T22:32:00.003+02:00

Baixo os lemas “ Emprego e salarios dignos. Non ao pacto social” e “O déficit público que o pague o capital. Reforma fiscal xa!”

A CIG convocará para o Primeiro de Maio, ‘Día do Internacionalismo Proletario’ manifestacións en todas as comarcas baixo os lemas “Emprego e salarios dignos. Non ao pacto social” e “O déficit público que o pague o capital. Reforma fiscal xa!”. A manifestación central, como en anos anteriores, terá lugar en Vigo, con saída do Cruce da Doblada ás 12:00 horas. Nestes dous lemas preténdense sintetizar os eixos nos que a central sindical centrará a campaña a desenvolver arredor desta significativa data. Por unha banda, salientando os principais problemas que padece a clase traballadora por mor da crise: emprego e salarios e, pola outra, reclamando unha reforma fiscal para que se garanta a progresividade do sistema e que paguen máis quen máis teñen.

Emprego e salarios son os dous principais problemas que ten, neste intre, a clase traballadora. O emprego, segundo explicou a secretario xeral, Suso Seixo, na rolda de presentación da campaña do Primeiro de Maio, pola grave perda de postos de traballo que se vén producindo neste último período e os salarios, porque é imprescindíbel recuperar o poder adquisitivo da clase traballadora para aumentar a capacidade de consumo e reactivar a economía.

Así, lamentou que lonxe de aplicar medidas dirixidas a solucionar estes problemas “as outras organizacións sindicais dedícanse a fomentar a idea de que a través do Pacto Social e desas Mesas de Diálogo Social que teñen constituídas en Madrid se poden articular alternativas á crise, no canto de combater as causas que a provocaron”. E denunciou a idea “profundamente equivocada” que se está transmitindo, ao facerlle crer á poboación que a solución para saír da crise está no mercado laboral e na reforma dese mercado, “cando non foi nin a súa rixidez nin os altos salarios os que a provocaron, senón a economía especulativa e mesmo a política de moderación salarial que se seguiu nos últimos anos, que provocou unha caída do consumo ou en moitos casos o endebedamento masivo da poboación para poder consumir”.

O déficit público que o pague o capital

Respecto do déficit, Suso Seixo afirmou que, efectivamente, a recesión económica está a xerar un déficit público importante. Malia isto, especificou que a CIG entende que “non é o déficit público quen nos levou á recesión”. Por iso a central sindical aposta por combater as súas causas e, en ningún caso reducir o gasto social, como están facendo os distintos gobernos. “Cremos que hai que incrementar o gasto público para reactivar a economía e que para combater o déficit público hai que pór en marcha unha reforma fiscal, incrementando os impostos directos sobre as rendas do capital e sobre as grandes fortunas. Sobre aqueles que teñen recursos que poden aportar ao estado para que este os utilice para fomentar a economía produtiva fronte á especulativa que foi a que se fomentou até o de agora”.

O secretario xeral da CIG fixo unha análise das alternativas que se están a barallar para saír da crise. Alternativas que confirman “a compoñente de clase deste sistema porque van dirixidas a recortar de novo dereitos, a precarizar as condicións laborais... a prexudicar unha vez máis á clase traballadora e non precisamente a buscar saídas á crise que eviten que se vaia reproducir ou que dure moito tempo, ou que axuden a saír canto antes da mesma”. Medidas das que salientou que manteñen intacto o actual modelo “orientado cara unha economía altamente especulativa que o que fixo foi favorecer precisamente os intereses dunha minoría: da oligarquía financeira, dos especuladores, fronte os intereses da maioría social”.

Seixo lembrou que fronte estas medidas a CIG aposta por controlar o sector financeiro, potenciar a economía produtiva fronte a especulativa, eliminar os paraísos fiscais ou pola creación dunha banca pública para garantir que os recursos cheguen ás familias ou ás empresas necesitadas.

Neste sentido, salientou que nos EEUU, país que representa o capitalismo neoliberal, hai hoxe un debate social en torno á necesidade dunha banca pública, porque hai moitos sectores que ante a cantidade de recursos públicos que se destinaron ao sector financeiro privado consideran que sería bastante máis rendíbel socialmente que eses recursos se canalizaran a través dunha banca pública. E mesmo lembrou que hai estados nos EEUU que contan cunha Banca Pública que foi, precisamente a que non tivo que recorrer ás axudas multimillonarias que aportou o estado a outros sectores que si entraron en quebra.

O secretario xeral da CIG lamentou que nin o goberno galego nin o goberno central estean dispostos a atender a estas propostas que se veñen facendo desde o campo sindical ao ámbito político e a aquelas institucións que tiñan que poñelas en práctica. “Ante iso só nos queda unha solución que é o traballo de concienciación social e a mobilización, para obrigar aos gobernos a que fagan políticas de carácter estrutural, e poñan en marcha reformas profundas que nos leven a un modelo de organización social e económico moito máis xusto, solidario e democrático que o modelo actual”.

Manifestacións

Vigo, ás 12:00 h. con saída do Cruce da Doblada.

Coruña, ás 12:00 h. con saída da Praza de Vigo

Santiago, ás 12:30 h. con saída da Praza Roxa

Pontevedra, ás 12:30 h. con saída da Praza da Ferrería

Ferrol, ás 12:00 h. con saída da Avda. de Esteiro

Lugo, ás 12:30 h. con saída da Ronda da Muralla

Ourense, ás 12:00 h. con saída do Pavillón dos remedios

Ribadeo, ás 12:30 horas, con saída do Edificio Sindical

V Congreso da Federación de Banca, Aforros, Seguros, Oficinas e Telemarketing

2010-04-10T21:42:00.007+02:00

Nova Executiva escollida no V Congreso da Federación

Hoxe, 10 de abril, celebrouse en Ourense o V Congreso da Federación de Banca, Aforro, Seguros e Oficinas da CIG, que desde hoxe inclúe o sector de Telemarketing tamén na súa denominación. O sector no que estamos encadrados (erradamente, ao noso parecer) incorporouse a esta federación hai catro anos. Daquela, a CIG non contaba con ningún delegado de persoal nos comités de empresa. Hoxe, só catro anos despois, a representatividade da Confederación Intersindical Galega ten atinxido o 20%, con importantes seccións sindicais nas principais empresas do sector en Galiza: Atento, Eurocen, Unísono CRM, Sykes, Universal Support, Bosch (con 12 representantes dun total de 17), ou o CAE112 (4 representantes dun total de 5). Todo isto malia as políticas de represión - despedimentos incluídos - que as empresas levaron a cabo contra os delegados e as delegadas elixidas por nós.

Cada vez, pois, temos máis capacidade para apoiar os traballadores e máis capacidade para loitar xuntos contra o abuso por parte das empresas. Exemplos diso foron os conflitos en Atento contra o desmantelamento da plataforma da Coruña; en Bosch contra a represión sindical e a deslocalización de Vodafone, igual que en Unísono; e exemplos continúan a ser os conflitos aínda abertos en Sykes contra a deslocalización e o ERE e en MkPlan21 contra a precarización da atención ás emerxencias.

O V Congreso Federal que hoxe celebramos en Ourense serviu para sintetizar as loitas mantidas, e tamén para visibilizar o sector de telemarketing, o máis precarizado de todos cantos haxa. E serviu aínda para escollermos a nova Executiva Federal, os representantes da executiva no Consello Confederal e o Secretario Nacional da Federación, que novamente será Clodomiro Montero. Desde a sección sindical da CIG no 112 queremos expresar os nosos parabéns aos novos cargos. O que resta é continuarmos a defensa dos nosos dereitos ameazados e mais a loita pola mellora das nosas condicións laborais.

Pois, todas e todos: a traballar!

Rueda confirma a súa boa disposición para negociar

2009-10-21T13:16:00.005+02:00

Na tarde do luns 19 celebramos, finalmente, a reunión que a Sección Sindical da CIG tíñamos solicitado á Consellaría da Presidencia. Asistiron o director xeral Santiago Villanueva, e o conselleiro Alfonso Rueda. Coa demanda da regulación das gardas retribuídas xa ben avanzada tanto coa empresa como coa administración, centrámonos en explicar a necesidade de que no próximo concurso público se exixan como condición tanto a subrogación como a consolidación salarial e a suba no tramo de operación. Pola parte da Xunta, tanto Rueda como Villanueva se mostraron favorábeis a incluir ambas as condicións, aínda que recoñecen mais dificultades no apartado salarial malia os avances que xa temos atinxido coa actual concesionaria. En todo caso, emprazáronnos a unha nova reunión de negociacións antes de mediados de decembro, coa finalidade de irmos concretando puntos de cara ao novo prego de condicións que a Xunta deberá elaborar antes do fin de xaneiro.

Polo tanto, verificamos un cambio na disposición da Xunta de Galiza, agora máis dialogante e cunha vontade crecente de resolver este conflito enquistado, e agardamos, portanto, que nas próximas reunións de traballo estexan dispostos a iren materializando esa boa vontade en acordos firmes.

A historia de sempre

2009-07-23T14:01:00.004+02:00

Hoxe mantivemos a reunión que convocáramos desde o Comité de Empresa do 112 co Director Xeral de Emerxencias e Interior, Santiago Villanueva, á que tamén se presentaron o Subdirector Xeral, o secretario da AXEGA e persoal de asesoría xurídica, que nos comentaron a decisión de mover o CAE112 para a vila da Estrada, no interior das instalacións da actual AGASP. Mais, fora de anuncios que xa coñecíamos pola prensa e de outros comentarios menores, a reunión serviu para que a administración nos dixese o que xa esperábamos: que seguen con vontade de subrogárennos e de regularizaren as gardas retribuídas, e que as nosas reivindicacións económicas terán que agardar a que se elaboren os orzamentos da Xunta de Galiza para 2010.

[Preme en "ler mais" para veres o resto]

A boa vontade, infelizmente, non nos serve para nada, porque boa vontade tamén tiñan os anteriores, e os anteriores aos anteriores, de modo que, sen dubidarmos da palabra de Santiago Villanueva, solicitámoslle a sinatura dun acordo para que no próximo concurso se contemplase a solución aos tres puntos irrenunciábeis que levamos anos demandando. Sen embargo, a negativa foi rotunda e Villanueva insistiu na necesidade de termos que confiar na súa palabra e, de novo, na boa vontade da consellaría e da dirección xeral. Non entendemos que, se teñen a absoluta seguridade de que se van solucionar as exixencias da subrogación e das gardas, se neguen absolutamente a asinar ese compromiso. E tampouco entendemos que a cuestión económica se teña que decidir en función de se os próximos orzamentos autonómicos se deseñan á alta ou á baixa. Quere iso dicir que se a Xunta de Feijoo segue a súa liña de austeridade orzamentaria, os traballadores do 112 vamos continuar sen o recoñecemento económico debido?

E aínda: non entendemos que ten a ver o esforzo que a DXEI di facer para mellorar a habitabilidade do centro de emerxencias – renovando o mobiliario e reorganizando o interior do propio centro – coas exixencias que nós temos presentado. Non dicimos que non sexan actuacións necesarias. Aínda ao contrario: son urxentes. Pero non teñen nada a ver cos problemas laborais e salariais do persoal do 112.

En calquera caso, dada a reiterada incapacidade da administración para comprometerse a serio na mellora das nosas condicións laborais (asinando acordos hoxe, mesmo que se poidan aplicar nun futuro próximo), a nosa resposta como Comité de Empresa é, en primeiro momento, convocarmos unha asemblea xeral, na que o conxunto do persoal decidiremos sobre a estratexia a seguir. Non estamos dispostos a seguir agardando indefinidamente. Tal como informamos aos representantes da administración nesta xuntanza, seremos nós quen marquemos os tempos en diante, e se a asemblea decide que se farán mobilizacións, faranse mobilizacións. Desde o Comité de Empresa preferíamos que os compromisos fosen firmes e que iso se demostrase mediante a sinatura de acordos de mellora. Pero a administración non quere, e nós xa levamos tempo de mais confiando na boa vontade dos nosos responsábeis.

112 mal dimensionado (outra vez)

2009-07-22T20:45:00.008+02:00

Xa temos comentado en multitude de ocasións que o 112 está mal dimensionado, que as previsións e que os ratios mínimos exixidos pola Xunta son insuficientes para facer fronte a xornadas en que se concentran un grande número de incidencias. As nosas denuncias quedaron demostradas durante o episodio do Klaus, en xaneiro deste ano, e así o fixemos saber á cidadanía galega. Daquela denunciamos a improvisación e a falla de capacidade operativa do CAE112, e o entón conselleiro da Presidencia, Méndez Romeu, aprestouse a dicir, por suposto, que todo estaba baixo control.

A xornada de hoxe recordounos as daquel momento, salvando as distancias, porque se repetiron os síntomas do dimensionamento tacaño do 112: chamadas en espera e verdadeiras dificultades para xestionar en tempo real as incidencias que se nos comunicaron. E todo isto durante un episodio de alerta amarela como hai tantos ao longo do ano. A que se debe unha ineficacia así? Ao noso ver, hai dous motivos claros. En primeiro lugar: as previsións de dimensionamento da Xunta son axustadas de mais para manteren a súa operatividade no caso dunha concentración de chamadas que se saia minimamente do normal. En segundo lugar: a empresa MkPlan21 incumpre flagrantemente os ratios mínimos ordenados pola Xunta de Galiza. Nunha mañá en que deberíamos estar a traballar nove xestoras e xestores, o dimensionamento foi apenas de sete, de modo que nos vimos obrigadas a traballar con mais presión do normal, do cal resulta que a atención prestada non foi todo o eficiente que debera.

O persoal do 112 queremos facer ben o noso traballo. Págannos por axudarmos as persoas perante as emerxencias, e non podemos facelo se nos obrigan a traballar por riba das nosas capacidades reais. Queremos un dimensionamento axeitado, que non se deseñe baixo a máxima de aforrar diñeiro, senón de ter capacidade para xestionar tamén baixo as condicións adversas que se repiten cada pouco tempo.

112: Do chiringuito ao circo

2009-07-08T15:18:00.006+02:00

Polo que parece, para resolver a urxentísima provisión de material aínda vamos ter que agardar a que a administración teña un bon día para saír na foto. Semella que os poderes políticos queren que a entrega das cadeiras no 112 se convirta nun motivo para a celebración, e pretenderán que sorriamos e que poñamos boa cara o día que desembarque no CAE112 o director xeral Santiago Villanueva, as cadeiras e a prensa. As cousas van así: de sermos un chiringuito a sermos un circo!

A voltas co mobiliario, o material e o ambiente de traballo

2009-06-23T02:50:00.004+02:00

A situación dos traballadores e das traballadoras do 112 é cada día máis comprometida pola deficiencia nos equipamentos de que dispoñen para realizar o seu traballo. Xa non é que a plataforma de telecomunicacións sexa claramente mellorábel. É que nos últimos temos o mobiliario e o material de traballo se ten deteriorado tanto que a situación comeza a ser insostíbel. De feito, esa é a idea que se lle trasladou ao novo responsábel pola DXEI, Santiago Villanueva, que nunha recente visita ao CAE puido comprobar a situación lamentábel en que temos que desenvolver o noso traballo.

A situación chega incluso ao ridículo. Non pode dicirse máis claro: se non se pon remedio inmediatamente, o persoal do 112 vamos ter que realizar o noso traballo de pe. A carencia de asentos, porén, é só o máis evidente. A sala de emerxencias é pequena de máis, está mal ventilada e peor climatizada - producindo problemas constantes coa temperatura e coa humidade ambiente. E, inclusive, as condicións dos vestiarios, da sala de refresco e incluso a seguranza que se lle exixe a centros como no que traballamos son altamente deficientes.

Ao noso ver, aquí conflúen dous problemas. Por unha banda, hai un evidente problema de espazo físico, que agardamos que se solucione coa provisión de novas instalacións conforme a lexislación e o sentido común. Pero, sobre todo, hai unha deixadez manifesta no que se refire ao mantemento do material e o mobiliario por parte da empresa, que se escusa continuamente dicindo que é un problema da administración. Non é certo. A empresa debe prover o material para o desemprego das tarefas, neste caso, de atención ás emerxencias. Se ese material lle chega a través da Xunta xa non é cousa dos profesionais que traballamos aí. E non estamos dispostos a seguir sufrindo problemas de saúde polo ambiente do lugar de traballo ou polo estado do mobiliario. É por iso que temos solicitado xa varias veces unha reunión do Comité de Seguridade e Hixiene para que esta situación se solucione canto antes. A reunión hase celebrar finalmente o 1 de xullo, pero énos imposíbel por moitas esperanzas nela. A empresa coñece perfectamente o problema e non fixo nada aínda. Que había de mudar despois desta reunión?

Confirmado: a AXEGA era un chiringuito inoperativo

2009-05-15T12:00:00.000+02:00

As queixas do persoal do 112 sobre o funcionamento da AXEGA desde a súa creación non se centraron só na súa negativa a falar dos problemas laborais dos traballadores e das traballadoras do Centro de Atención de Emerxencias 112. Temos comentado máis dunha vez, inclusive en roldas de prensa convocadas ao efeito, que, malia as grandes cantidades de gasto en dotación recursos materiais, non se fixera nin unha soa mellora na capacidade de resposta do 112, e que a AXEGA era, na práctica, un chiringuito inoperativo.

Onte, o novo Director Xeral de Emerxencias e Interior confirmou as nosas denuncias, facendo públicos os mesmos problemas da Axencia Galega de Emerxencias. A nova, que foi recollida por diversos medios de comunicación, refire tamén a intención da DXEI de mellorar o funcionamento do 112 - algo que prometera José Luis Méndez Romeu despois da vergoñosa resposta ao Klaus a comezos de ano, pero que xamais de fixo. Agardarmos que esta nova ollada posta sobre o melloramento da xestión das emerxencias en Galiza inclúa tamén en breve melloras sociais e laborais que conduzan a unha maior estabilidade (e, polo tanto, fidelización) do plantel de profesionais que traballan no 112.

Así o recolleron Xornal de Galicia e Europa Press.

Director Xeral ve razoábeis as exixencias do 112

2009-05-13T16:29:00.005+02:00

Despois da reunión que mantivemos onte cos novos responsábeis políticos do 112, as sensacións que temos son moderadamente optimistas.

Quedou demostrado na práctica a ineptitude dos anteriores responsábeis políticos do 112, porque nada costaba manter as boas formas e as boas relacións. En lugar diso, arranxaron negándose a falar e sacando comunicados de prensa absurdos e infantís. E tamén se demostrou que a nova administración, cando menos polo dito hoxe, ten vontade de solucionar o que o propio PP provocara hai xa anos ao privatizar o 112. Entenden, como nós, que se trata dun servizo público esencial, e que nel se dan unhas carencias (materiais, de persoal, de dignidade laboral, de estabilidade...) que poden ser resoltas con vontade. E, polo visto, están dispostos a facelo. De entrada, xa se teñen posicionado en varias ocasións a prol da subrogación - hoxe reafirmouno Santiago Villanueva, o Director Xeral de Emerxencias e Interior, que ademais dixo ter a intención de que o seu departamento non repetise a actitude da anterior Dirección Xeral de Protección Civil, que se desvinculara do CAE-112 para sorpresa de todos.

Ademais, remitímoslle un documento onde se explican os acordos e preacordos alcanzados coa empresa a respeito dos tres puntos esenciais das nosas reivindicacións, que non mudaron co cambio de goberno, como tamén lle explicamos. O seu compromiso é estudar a viabilidade das propostas, que considera razoábeis e xustas, e suxerir a solución do conflito á nova Consellaría de Presidencia, agora dirixida por Alfonso Rueda. Agardarmos, como tamén comentamos na xuntanza, que a pronuncia non se faga agardar demais, e que, aínda que o acordo non poida entrar en vigor até o novo concurso, se asine o antes posíbel para recuperarmos a estabilidade mínima no 112.

112 á procura de compromisos dos novos interlocutores

2009-05-11T11:46:00.007+02:00

Santiago Villanueva e Alfonso Rueda,

novos responsábeis polo CAE112

Nesta semana soubemos que, definitivamente, o CAE112 vai quedar inscrito na Dirección Xeral de Emerxencias e Interior, e desde a sección sindical da CIG no Comité de Empresa puxémonos a traballar para confirmar unha xuntanza de traballo co novo responsábel por este departamento da Xunta. Finalmente, a data quedou confirmada para o mércores 13 de maio. Agardarmos que Santiago Villanueva teña a ben presentarse cunha actitude aberta e dialogante - o que non fixeron os seus antecesores na xa extinta Dirección Xeral de Protección Civil. Queremos saber como se van encetar os retos da AXEGA e como se van implementar as necesarias transformacións no 112, así como o modo en que elas van afectar o persoal de emerxencias. E, sobre todo, queremos acordar os puntos de mellora da situación laboral das e dos profesionais que traballamos no Centro. Para isto, o noso programa é o que xa tentamos expor á anterior administración: subrogación, salario digno e regulamento das gardas retribuídas. Non pasaremos por menos.

PP mantén as súas intencións de subrogar o persoal do 112

2009-04-22T12:33:00.003+02:00

Beatriz Mato Otero
Conselleira de Traballo e Benestar

Nestes días comezou xa a facerse pública a estrutura orgánica do novo goberno galego, e o persoal do 112 soubemos que estaremos encadrados de novo na Consellaría da Presidencia, Administracións Públicas e Xustiza que dirixirá Alfonso Rueda. Tras coñecermos a nova, comunicámonos cos representantes do PP que nos recibiran antes das eleccións. Beatriz Mato, agora conselleira de Traballo, confirmou que manteñen as intencións que xa nos anunciaran na reunión preeleitoral, de modo que seguirán a apostar pola subrogación total do persoal do Centro de Atención de Emerxencias. Agardamos que a data para a próxima reunión de traballo sexa fixada a próxima semana, para poder terminar canto antes con esta situación cada día máis insostíbel.

Lectura do 112 sobre os resultados do 1M

2009-03-03T17:41:00.007+01:00

Os resultados eleitorais deste 1 de marzo non deixan lugar para dúbidas a ningún sector social. Tampouco para os traballadores e traballadoras do 112. É doado coincidir coa lectura xeral que da vitoria do PP fan a maior parte dos comités de empresa do país: o bipartito perdeu o goberno non só pola campaña de desprestixio centrada nos temas de despilfarro e bicefalia. PSOE e BNG perderon o goberno porque perderon a base social que os levara adiante ao reproduciren hábitos vellos.

En moitos casos, o bipartito non só non recuperou privatizacións nin apostou decididamente pola dignidade laboral no país, senón que avanzou na administración paralela coa creación de novos chiringuitos - sociedades de xestión desprovidas de funcionalidade real. Para o ámbito da xestión de emerxencias, é o caso da AXEGA. A lectura que desde o 112 podemos facer é que o PSOE se equivocou á hora de negar reiteradamente o dereito á estabilidade e á dignidade laboral. A súa teima mantívose mesmo na época de campaña, cando se negou a contestar a nosa solicitude dunha reunión que sí mantivemos con BNG e PP.

O PP, de feito, mostrouse moi favorábel a esa subrogación que é o noso obxectivo desde hai xa dous anos. Que o PP mostre mais sensibilidade a este respeito que o PSOE é xa significativo do divorcio do goberno (agora en funcións) e dos traballadores. Agora é o momento de lembrarmos ao PP as súas propias palabras a favor da subrogación do persoal do 112, para terminarmos dunha vez con este conflito social.

112 procura o posicionamento dos partidos políticos

2009-02-27T00:19:00.005+01:00

O comité de empresa do 112 solicitou nesta última semana unha reunión cos candidatos ao parlamento dos tres partidos con maior representación. A nosa intención era coñecer a postura que cada un dos grupos mantería a respeito da situación laboral do 112, tanto no caso de que gobernase como no caso de que estivese na oposición.

Representación do 112 durante a conversa con membros do PP

Hoxe de mañá, as 11h00, mantivemos unha reunión con Beatriz Mato e Ruiz Rivas a respeito do noso conflito. Despois de explicármoslles a situación a día de hoxe e de reflectirmos sobre o colapso do 112 cada vez que hai unha emerxencia maior -caso dos últimos temporais, en xaneiro- o PP expresou a súa intención de solucionar o problema o antes posíbel no caso de asumiren o goberno.

Representación do Comité de Empresa conversa coa representante do BNG

Pola súa vez, a reunión co BNG produciuse ás 12h00. Alí puidemos explicar á candidata Ana Pontón a nosa situación polo miúdo, a todos os niveis, incidindo en que o conflito estaría resolto sempre que a administración facilitase a subrogación ou calquera fórmula xurídica que na práctica teña un significado idéntico. A postura do BNG, como se nos indicou, é que a administración debería ter un peso decisorio na xestión dos servizos básicos, e non deixar totalmente o seu funcionamento a empresas prestatarias privadas. Recordan, con todo, que a xestión do 112 corresponde á Consellaría da Presidencia e, polo tanto, ao PSOE; de modo que suxeriron que volvesemos contactar sobre o tema unha vez se coñezan os resultados eleitorais do 1 de marzo.

Isa Moares, presidenta do C.E. do 112, a solicitar a reunión con PSOE

Canto ao PSOE, a única comunicación que tivemos con eles foi telefónica, cando lles solicitamos a reunión co candidato á presidencia, Pérez Touriño, ou con algún outro candidato ao parlamento. A súa resposta foi que nos chamarían e, como é habitual neste grupo, aínda estamos a agardar.

Pontevedra: 112 presente!

2009-02-27T00:05:00.006+01:00

Persoal do 112 perante a ollada atenta das forzas de seguridade diante do Palacio da Cultura

O persoal do 112 estivemos no mitin de Touriño no Palacio da Cultura de Pontevedra, onde unha vez máis despregamos os cartaces no interior e exiximos dignidade laboral no exterior, desde onde podían ouvirnos perfectamente no interior, incluído Touriño e algunha conselleira, que mesmo se referiu a que durante o goberno do PSOE se tiña acabado coa presenza dos chamados "chiringuitos". Ben, o 112 ten xa tamén experiencia en chiringuitos: a AXEGA é un deles, un "ente" de xestión que só serve para que o seu xerente nos agradeza a profesionalidade polo noso comportamento profesional perante as emerxencias maiores. Nós queremos menos agradecementos e máis compromiso en dignificar as nosas condicións laborais.

Compostela: 112 presente!

2009-02-25T12:37:00.007+01:00

Persol do 112 presentes á chegada de Touriño

Momento en que Touriño baixa do coche oficial e ouve as exixencias do 112 por enésima vez

Hoxe estivemos no encontro con empresarios que Touriño mantivo en Compostela. Dado que a xuntanza era de acceso restrinxido, tivemos que berrar as nosas exixencias fora, onde unha vez máis, o presidente tivo que ouvir o que tenta negar: o 112 é un servizo público, privatizado e precarizado, onde as traballadoras e os traballadores teñen que saír ás rúas para exixir unhas melloras que son de lei. Non queren escoitarnos, e sen embargo, ouvennos en todas partes: por un traballo digno e un servizo de calidade. Non será por falla de repetírmosllelo.

A Estrada: 112 presente!

2009-02-25T02:02:00.007+01:00

Forzas de seguridade pública e seguridade privada mantivéronnos afastados da saída do teatro, malia o cal a nosa presenza foi ben sentida por Touriño e os asistentes ao mitin

Como non podía ser doutro modo, un grupo de traballadoras e traballadores do 112 estivemos presentes no mitin que Emilio Pérez Touriño celebrou na Estrada. Os medios de seguranza impedíronnos tirar as fotografías e mesmo nos convidaron a saír do Teatro Principal antes de que tivésemos feito calquera movemento, polo que tivemos que continuar a nosa mobilización na rúa, onde á saída do acto varios asistentes se achegaron para interesarse pola nosa situación. Todo isto diante da ollada atenta das forzas de seguridade, que nos mantiñan a unha distancia considerábel do teatro, a pesar do cal a nosa presenza se puido sentir ben cando Touriño abandonaba o edificio.

112 anuncia folga se a Xunta non responde

2009-02-23T22:53:00.005+01:00

Momento da rolda de prensa celebrada o 23 de febreiro de 2009

Entrevista a Isa Moares sobre as mobilizacións do 112

RNE - 23 de febreiro de 2009

Entrevista a Isa Moares sobre as mobilizacións do 112

Radio Galega - 23 de febreiro de 2009

Na rolda de prensa celebrada hoxe ás 12h00 no local da CIG en Compostela, o 112 explicamos unha vez máis a nosa situación laboral e as melloras exixidas; demos conta das mobilizacións realizadas até o momento e informamos da nosa intención de seguirmos a participar na campaña electoral a través de protestas nos actos e mitins do PSOE porque entendemos que de Touriño depende a rápida solución deste conflito. Unha vez máis, explicamos que xa chegamos a principios de acordo coa empresa prestataria do servizo, MkPlan21, e que é a administración a que bloquea a solución do conflito ao negarse a recoñecer o dereito dos traballadores á estabilidade laboral.

Pero, sen dúbida, o momento máis repetido da rolda de prensa foi o anuncio de que o 112, co acordo da asemblea de traballadores e traballadoras podería ir á folga a partir do primeiro de marzo. Así o recolleron diversos medios de comunicación, como Localia TV, RNE ou Radio Galega, ademais de axencias de noticias como a AGN, Europa Press, etc.

- Nova da rolda de prensa en La Voz de Galicia

- Nova da rolda de prensa en El Economista

O Grove: 112 presente!

2009-02-21T23:17:00.014+01:00

Momento en que un dos grupos do 112 desprega os cartaces por un traballo digno

Outro dos grupos do 112 é bloqueado e convidado a abandonar o recinto

A brutalidade foi a tónica xeral dos medios de seguridade privada do PSdG

Expulsados do Pavillón Municipal do Grove, o 112 proseguimos a protesta no exterior durante a saída de Touriño

Unha boa mostra do dano que están a facer as mobilizacións do 112 durante os actos de campaña de Emilio Pérez Touriño é a brutalidade con que se emprega a seguridade privada, como demostran as imaxes recollidas por varios medios de prensa presentes, e que, por certo, contrasta coa amabilidade e boa disposición das forzas de seguranza do Estado, que se limitan a acompañarnos para evitar movementos que, por outra banda, saben que non imos realizar. A nosa protesta é pacífica e as nosas exixencias son de lei. Os métodos da seguridade do PSdG son a violencia e as ameazas. Porén, insistimos nas nosas mobilizacións.

Cangas: 112 presente!

2009-02-20T00:05:00.008+01:00

Faixa culpabilizando a Xunta despregada no acto

Momento en que a seguridade do evento retira a pancarta

Ao berro de 112 Solución, estivemos presentes tamén á saída do mitin

112 estivo o mércores en Cangas, intervindo no mitin de campaña celebrado no auditorio municipal da vila pontevedresa, onde Touriño veu a dicir que o seu goberno non se esconde nos despachos, dá a cara e non cala a boca de ninguén. Por suposto, iso díxoo despois de que a seguridade do evento "convidase" a sair ás compañeiras e compañeiros do recinto.

Con todas, tiveron que escoitarnos á saída, cando pasaron diante do grupo de profesionais que exixían unha solución que só depende da administración e que non custa nada.

A nova na dixital de diario Metro

Como respondería Touriño ao 112... se o fixese

2009-02-15T15:07:00.001+01:00

A teor da actitude mostrada nos últimos tempos a respeito do funcionamento e das condicións sociais e laborais no CAE112, o persoal de emerxencias consideramos que estas serían as respostas a algunhas das nosas preguntas.

Vilagarcía: 112 presente

2009-02-15T08:58:00.012+01:00

112 Solución presente unha vez máis nos actos dos responsábeis políticos da nosa situación

Despregáronse as faixas que os máis de seis mil asistentes puideron ver

Momento en que Touriño se apercibe da presenza do persoal do 112

Persoal da organización retira as faixas mentres algúns asistentes recoñecen que temos dereito

Un dos grupos do 112 cando é convidado a abandonar o recinto do mitin

Vixiados por forzas de seguridade, o 112 agardou pola saída de Touriño

En Vilagarcía, durante o mitin no Fexdega, o 112 volvemos estar presentes até sermos convidado a abandonar o recinto polos organizadores do evento, de moi malos modos, por certo, e malia estarmos no fondo para non molestarmos as persoas que asistían. As máis de seis mil alí congregadas puideron ler o "112 Solución" e "112 - Xunta culpábel". Habería que ver que explicacións dá o PSdG ao seu eleitorado.

112 exixe solución en Compostela

2009-02-12T12:02:00.008+01:00

Persoal do 112 e da CIG no acceso ao Palacio de Congresos de Compostela

Momento en que Touriño chega ao punto e ouve os berros pola solución no 112

Os responsábeis pola xestión dos servizos públicos de emerxencias seguen sen querer escoitar o persoal do 112, de modo que mantemos a nosa presenza na campaña política. Nalgún momento terán que sentar a negociar as condicións da subrogación do servizo, porque só será por aí que pararemos as nosas mobilizacións e as nosas campañas de información cidadá. Desta vez foi no Palacio de Congresos de Compostela.

112 protesta en Vigo

2009-02-10T23:17:00.005+01:00

Compañeiras do 112 á entrada do acto da Fundación Barrié - Vigo - 10.02.09

Touriño e o seu séquito observaron o persoal do 112 á entrada do evento

Tal como se anunciara, o 112 non tivo outra alternativa que levar unha vez máis ás rúas a campaña de protesta contra as irresponsabilidades do presidente da Xunta, da Consellaría da Presidencia e da AXEGA. Por iso, hoxe estivemos en Vigo, no acto de presentación da denominada Cidade do Mar, facendo saber á cidadanía que Emilio Pérez Touriño se dedica principalmente a crear novos “chiringuitos” e a manter os herdados do goberno anterior que lle interesan. As medidas de seguranza impedíronnos estar presentes no acto, onde tíñamos pensado despregar unha faixa pacificamente; impedíronnos estar nas inmediacións do edificio e impedíronnos incluso entregar ao presidente un documento explicativo da nosa situación, onde ademais é explicado en que medida a Xunta é responsábel. De modo que tivemos que mudar a nosa estratexia de protesta pacífica e silenciosa polo berros, os golpes de bombo e a megafonía desde o outro lado da rúa de Policarpo Sanz, atravesando o ruído do tráfico e das obras que hai nese punto, e as portas da Fundación Barrié, que os organizadores teimaban en pechar para evitar molestias ao presidente. Foi en van. Dentro ouvíusenos ben. O que nós queremos é que, ademais, nos escoiten.

Xunta reforzará 112 (?)

2009-02-01T10:26:00.005+01:00

Presionada polos medios de comunicación e perante a vergoña do colapso do 112, que non quere recoñecer, a Xunta de Galiza anunciou, a través do presidente, Emilio Pérez Touriño, que se vai proceder a reforzar o servizo público de atención ás emerxencias (por certo, xusto despois de que Méndez Romeu dixese que todo funcionou satisfactoriamente). Sen embargo, non se precisou en momento ningún como facelo. Ao noso ver, existen dúas posibilidades:

[Preme en "Ler máis" para veres o resto da nova]

En primeiro lugar, dirán que se incorporou con carácter urxente máis persoal ao 112. Iso será unha mentira máis, porque o persoal que se incorpore, e que aínda comezará o seu período de formación este mes de febreiro, xa estaba contactado antes dos acontecementos do fin de semana do 25 de xaneiro. Isto quere dicir que ese reforzo non se corresponde coa problemática evidente de que no 112 non hai suficiente persoal, senón que é un reforzo dos que habitualmente se realizan para cubrir a marcha de persoal ou as baixas laborais, obrigando, ademais, a este persoal novo, a asumir quendas de traballo absolutamente desreguladas (back-ups) para cubrir as carencias puntuais - nunca as xerais. En conclusión, se este reforzo é como os anteriores, o 112 seguirá mal dimensionado e os colapsos seguirán a producirse e a ser resoltos por traballadoras e traballadores que farán traballo voluntario.

A outra opción é faceren un plano ambicioso de entrada de profesionais formados correctamente -sen as presas que caracterizaron outras incorporacións-, e que este plano teña un impacto tamén na consolidación do persoal que está xa a prestar servizos. Dixémolo multitude de veces e seguimos a dicilo: sen unha estabilidade laboral mínima (ausencia de subrogación) e cos salarios ridículos (convenio de telemarketing, máis subas non consolidadas) que percibimos, só unha pequena parte do persoal pensa no 112 como un traballo de futuro, polo que, así as cousas, é imposíbel manter un plantel formado por profesionais con experiencia capaces de atender

Os traballadores e as traballadoras do 112 tememos que o anuncio da Xunta termine centrándose na primeira das opcións, que, como xa dixemos, non soluciona nada.

Neglixencia da AXEGA repercute nos medios

2009-01-29T21:41:00.011+01:00

Entrevista a Óscar Valladares sobre a precariedade do 112

Radio Voz. 20.01.2009

Preme en "Ler mais" para veres o resto da nova,

coas ligazóns á prensa escrita e as declaracións da

administración sobre a próxima mellora do CAE112

Diversos medios de comunicación galegos quixeron escoitar a opinión dos traballadores e das traballadoras do CAE 112 Galiza a respecto da xestión que o propio centro, responsabilidade da AXEGA, realizou durante o fin de semana que durou a alerta meteorolóxica. Os datos e as interpretacións do acontecido por parte do persoal do servizo foron recollidas pola prensa escrita, tanto nas súas edicións en papel como nas edicións electrónicas (varios titulares en La Voz de Galicia, Vieiros, Galiciae, Diario de Ferrol, A Nosa Terra Diario, Galicia Hoxe, Xornal de Galicia, El Correo Gallego, e La Opinión), e pola prensa radiofónica (Radio Voz, Cadena Ser, Cadena Cope, Onda Cero ou Radio Galega). A información foi emitida incluso pola TVG, que até o momento nunca mostrara o conflito do 112 nin as súas consecuencias, e tamén por redes sociais e outros medios pouco habituais (Terra Actualidad, Noticias Ya.com, Yahoo Noticias, Gente Digital) y por medios estatais como El País.

Diante da repercusión que están a ter as consecuencias da xestión neglixente da AXEGA e a situación de precaridade laboral a que estamos sometidos o persoal do 112, Méndez Romeu apresurouse a dicir que a resposta do servizo público tiña sido "satisfactoria". A resposta foi tan ridícula que hoxe mesmo, o presidente Pérez Touriño tentou tranquilizar a poboación indicando que se aumentaría a capacidade operativa do 112.

O consello da Xunta quere mellorar o servizo de xestión de emerxencias

Porén, para que quere aumentar a capacidade se a resposta foi axeitada? O consello da Xunta acordou hai unhas horas reforzar o servizo, pero non se especifica o modo en que isto se fará, polo que as traballadoras e os traballadores do 112 tememos que isto non se vaia traducir nas melloras que levamos dous anos exixindo e que son tamén claves á hora de comprender cales foron os erros no 112 nese fin de semana: a non subrogación do persoal e os salarios ridículos fan con que o traballo sexa precario e dificultan o mantemento dun plantel con ampla experiencia, xa que o persoal do 112 ten que procurar outros traballos para gañar un salario digno; e, ademais, a total desregulación dos horarios de traballo e das gardas retribuídas provocan un cansazo adicional no persoal, que está menos áxil á hora de realizar o seu traballo. Trátase, pois, de exixencias que incumben aos operarios do 112, pero que tamén teñen consecuencias na calidade dun servizo que hoxe está totalmente en entredito.

A estratexia da Xunta: negar os problemas

2009-01-28T17:11:00.004+01:00

Telexornal Mediodía da TVG

28/01/2009 - 14h38

A estratexia dos últimos meses na Xunta parece ser negar os problemas. Primeiro negaron que o 112 fose un servizo público. Despois negaron que o goberno galego tivese algo a ver coas persoas que solucionan as emerxencias da cidadanía galega. Máis tarde negaron teren calquera chave para a solución do conflito, e, seguidamente, negaron até o conflito. E agora, simplemente, negan que no fin de semana o Centro de Atención ás Emerxencias se vise superado unha vez máis porque o dimensionamento é incorrecto e porque a empresa incumpre sistematicamente o número mínimo de xestores de emerxencias por quenda. Podemos xogar a negalo todo, mais iso non vai solucionar nada.

112 agarda resposta da AXEGA e da Consellaría

2009-01-27T13:04:00.005+01:00

Seguimos agardando pola resposta da AXEGA e da Consellaría da Presidencia a respeito do informe favorábel á subrogación emitido pola empresa concesionaria MkPlan21. Despois de diversas negativas a reunírense connosco e de varios adiamentos, a administración demostra unha vez máis o seu interese nulo en resolver o conflito. De novo, incumpren a palabra dada cando indicaron que responderían a exixencia de subrogación a mediados de xaneiro. Xa a finais de mes, o único que temos é a calada por resposta, a pesar de que deles depende a resolución deste conflito. Isto é así porque a empresa, coa que xa alcanzamos principios de acordo en varios puntos, se nega a asinar calquera cousa se antes non se soluciona ese tema concreto. Tristemente, a estratexia da AXEGA e da Consellaría de manteren silencio parece máis propia de cativos do que de persoas adultas con responsabilidades políticas. Así as cousas, non nos queda máis alternativa que insistirmos e mantermos as mobilizacións.

"Cada un no seu sitio" - 112 prosegue mobilizacións

2009-01-23T11:09:00.004+01:00

Agardábamos que, tal como nos informaran, a administración dese algunha resposta ao informe emitido pola empresa MkPlan21, favorábel á subrogación, a mediados de xaneiro. Porén, xa sabemos como funcionan estas cousas na Xunta: sempre hai asuntos máis importantes que arranxar o que previamente se fixo mal ou viña mal feito. A súa estratexia parece ser a de gardar silencio.

[Preme en "Ler máis" para veres o resto da nova]

Non sabemos o que pretenden, pero saben xa que as nosas mobilizacións non van parar. Por iso, en próximos días iniciaremos a nova campaña de información cidadá para pormos cada un no seu sitio. En primeiro lugar, Francisco Echeverría, responsábel da AXEGA, que se nega a recibir os representantes do persoal do 112; en segundo lugar, Mª Ester González Saavedra, responsábel da Dirección Xeral de Protección Civil, á que estaba adscrito o 112 até a creación da AXEGA e que incumpriu reiteradamente todas as súas promesas coas traballadoras e cos traballadores; en terceiro lugar, José Luis Méndez Romeu, Conselleiro da Presidencia da que dependia a DXPC e a AXEGA e que, ademais dun pavor infantil e ridículo á subrogación, é abondo altivo como para non enfouzar as mans cos problemas dos e das profesionais que dependen del; e, por último, Emilio Pérez Touriño: responsábel final de toda a xestión do goberno autonómico, tamén para as barbaridades que se cometen.

Subrogación no 112: dereitos e reveses

2009-01-20T16:56:00.023+01:00

Reproducimos a continuación un interesante e completo artigo que nos aporta Héctor López de Castro, avogado do Gabinete Xurídico da CIG, sobre o dereito de subrogación. Esta é unha das nosas reivindicacións principais e parece que o último atranco para chegar a un acordo definitivo. Pretendemos clarexar dunha vez os motivos polos que o consideramos tan necesario e tamén deixar ben claro que este dereito non nos achega legalmente, en ningún caso, a ser funcionarios pola porta de atrás que semella ser o grande medo da Consellería.

[Preme en "Ler máis" para ler o artigo]

SUBROGACIÓN NO 112: dereitos e reveses

A normativa estatal sobre sucesión de empresas, nomeadamente o artigo 44 do Estatuto dos Traballadores (ET), ten por obxecto protexer os traballadores, en caso de mudanza de empresario, para garantir o mantemento dos seus dereitos. Porén, a xurisprudencia afirma que as normas relativas á subrogación non son aplicábeis nos casos de terminación dun contrato administrativo de xestión de servizos públicos.

Así, por sentenza do Tribunal Supremo do 10 de decembro de 1997 (ditada en unificación de doutrina) declarouse que, nos casos de sucesión de contratas, non existe transmisión de actividade dunha empresa a outra, senón finalización dunha contrata e comezo doutra nova. E isto a pesar de que materialmente sexan os mesmos servizos contratados.

A subrogación do art. 44 ET só se produce cando se transmiten ao novo concesionario os elementos patrimoniais necesarios para a continuidade da explotación. En sentido contrario, non existe subrogación ope legis cando hai unha mera sucesión temporal de actividade sen entrega do mínimo soporte patrimonial necesario para a realización desta. É tamén o criterio do Tribunal de Xustiza da Unión Europea na sentenza do 11 de marzo de 1997 (Asunto Süzen/Zehnacker), nun caso relativo á sucesión de contratas de limpeza.

Descartada a subrogación por efecto directo da lei, que mecanismos existen para garantir a estabilidade dos cadros de persoal en caso de sucesión de contratas administrativas? Pois basicamente dous: o convenio colectivo e o prego de condicións.

No artigo 18 do convenio colectivo de Contact Centers, recóllese unha versión light do dereito á subrogación, aínda que sen designalo con este nome. Así, a nova contratista está obrigada á contratación do 90% dos traballadores da contratista anterior adscritos ao servizo, sempre que levasen prestando servizos durante máis de doce meses e baixo un baremo cos seguintes factores: os seguintes factores: 50% de tempo de prestación de servizos na campaña; 10% formación recibida durante a campaña e 40% selección. Obviamente, é un sistema pouco satisfactorio do punto de vista da estabilidade no emprego, na medida en que a nova empresa recebe un cadro de persoal cohesionado, con experiencia e formación para a prestación óptima do servizo, mais conserva unha ampla marxe de discrecionalidade para vetar aqueles traballadores que lle resulten menos desexábeis.

A alternativa realista e factíbel a esta situación sería que a Xunta de Galiza recollese, nos pregos de cláusulas administrativas que regulan a concesión do servizo público, a obriga da nova empresa adxudicataria de contratar o cadro de persoal que viña prestando o servizo. Máis que como un dereito subxectivo dos traballadores, esta subrogación configuraríase como unha carga contractual para a empresa, que estaría obrigada a aceptala como unha condición máis da contrata, de xeito que os traballadores pasarían da empresa saínte á entrante, converténdose en persoal fixo da contrata, en vez de persoal fixo dunha empresa determinada, como garantía da continuidade e profesionalidade do servizo de emerxencias.

En ningún caso pode interpretarse que a introdución de cláusulas deste tipo nos contratos administrativos supoña atribuír aos traballadores ningún dereito ou expectativa de acceder ao emprego na propia Administración. Antes ao contrario, o dereito á subrogación incoporaríase precisamente ao contrato administrativo que formaliza a externalización do servizo público, o que exclúe calquera confusión entre empregados públicos e privados. Ao teimar en impedir a subrogación, a Xunta de Galiza perde unha excelente oportunidade de demostrar o seu compromiso cos deeitos dos traballadores e a estabilidade no emprego. En definitiva, de converter as palabras en feitos.

Héctor López de Castro
Gabinete Xurídico da CIG